نظام الدین مرکز نہیں ہوگا بند، دہلی ہائی کورٹ نے 14 اکتوبر تک کھلا رکھنے کی دی اجازت

دہلی ہائی کورٹ نے پیر کے روز نظام الدین مرکز میں مسجد احاطہ کی پانچ منزلہ عمارت کو نماز کے لیے پھر سے کھولنے کی اجازت دینے والے اپنے عبوری حکم کو 14 اکتوبر تک بڑھا دیا ہے۔ جسٹس جسمیت سنگھ نے یکم اپریل کے عبوری حکم کو آگے بڑھاتے ہوئے کہا کہ 14 اکتوبر کو سماعت کی آئندہ تاریخ تک گزشتہ حکم ہی جاری رہے گا۔

نظام الدین مرکز احاطہ میں کووڈ پازیٹو معاملوں میں تیزی کے بعد 30 مارچ 2020 سے ہی مرکز بند تھا۔ 16 مارچ کو ہائی کورٹ نے شب برات کے مدنظر یکساں ضابطے اور شرائط کے ساتھ لوگوں کے لیے مسجد کھولنے کی اجازت دی تھی۔ اسی بنچ نے رمضان کے دوران پابندیوں میں ڈھیل دینے کی دہلی وقف بورڈ کی عرضی قبول کرتے ہوئے کووڈ پروٹوکول اور سوشل ڈسٹنسنگ پر سکتی سے عمل کے ساتھ مسجد کو کھولنے کی اجازت دی تھی۔

اس دوران یہ بھی واضح کیا گیا کہ ’تبلیغی سرگرمیوں‘ سمیت احاطہ میں کوئی پروگرام نہیں ہو سکتا اور ہدایت دی گئی ہے کہ صرف نماز ادا کی جا سکتی ہے۔ ساتھ ہی عدالت نے انتظامیہ کو ہر منزل پر سی سی ٹی وی کیمروں سے بھیڑ کی نگرانی کرنے کی ہدایت بھی دی ہے۔ دہلی پولیس نے بھی نظام الدین مرکز کی انتظامیہ سے داخلی و خارجی دروازے کے ساتھ ساتھ ہر منزل کی سیڑھیوں پر سے لاپتہ سی سی ٹی وی کیمروں کو دوبارہ وہاں نصب کرنے کی ہدایت دی ہے۔