علی گڑھ: پی ایم مودی کی ’جنتا کرفیو‘ کی اپیل، عوام گھروں میں قید، پولیس نے کی سخت پہریداری

علی گڑھ: وزیر اعظم نریندر مودی کے 22 مارچ اتوار کے روز ’جنتا کرفیو‘ یعنی ملک بھر کے شہریوں کو اپنے اپنے گھروں میں صبح 7 بجے سے رات 9 بجے تک رہنے کی اپیل کا شہر و دیہی علاقوں میں زبردست اثر دیکھنے کو ملا، اس دوران ضلع بھر کی تمام سڑکیں خالی نظر آئیں۔ پی ایم کی اپیل کے بعد ضلع انتظامیہ نے بھی اس کو مکمل طور پر نافذ کرائے جانے کے لئے کمر کس لی تھی، اس دوران 21 مارچ دیر شب سے ہی ضلع بھر کی تمام حدود کو ایک درجن سے زائد جگہوں پر بند کیے جانے کے علاوہ باہر سے آنے والے تمام مسافر و پرائیویٹ گاڑیوں کو روک دیا تھا۔

دیر شب تک اپنی ضروریات کی اشیاء خریدنے والے عوام جگہ جگہ پولیس فورس کی تعیناتی کے سبب مجبوراً اپنے اپنے گھروں میں قید ہو گئے۔ اس کے علاوہ پولیس کو جو بھی سڑک پر آتے جاتے نظر آیا پولیس اہلکاروں نے اس کو دوڑا کر واپس جانے کے لئے مجبور کر دیا۔ قصبہ اترولی کے گاؤں نرینا کے حلقہ سے آنے والی سدھا و ان کے شوہر اپنے بچے کو دوا دلانے کے لئے شہر آ رہے تھے، پولیس نے ان پر لاٹھیاں برسا دیں۔ کسی طرح وہ معافی تلافی کے بعد اپنی جان پولیس سے چھڑا سکے۔ اسی طرح کیشو ولد امریش ساکن چھرہ اپنی بائیک سے واپس جا رہے تھے کہ پولیس نے انہیں پکڑ لیا و مارپیٹ کی وہ بھی معافی کے بعد کسی طرح اپنی جان چھڑائی۔ ضلع بھر میں درجنوں وارداتیں پولیس پٹائی کی اب تک رونماء ہو چکی ہیں۔ معاملہ کی شکایت ملنے پر اے آئی سی سی کے سکریٹری و سابق ممبر اسمبلی وویک بنسل نے پولیس کی اس طرح کی زبردستی عوام مخالف عمل کی شکایت ایس ایس پی منی راج جی سے کی ہے۔

وہیں شہر کے میئر محمد فرقان نے بھی عوام سے اپیل کی ہے کہ وہ اس خطرناک مہلک مرض سے بچاؤ کے لئے محتاط رہیں ساتھ ہی انہوں نے پولیس کے اس جبر و ستم کی مذمت کرتے ہوئے اعلیٰ افسران سے شکایت کر ضروری اقدامات کیے جانے کی بات کہی ہے۔ ماہر قانون و سینئر ایڈوکیٹ کنور سلطان حیدر نے پی ایم کی اپیل کو درست ٹھہراتے ہوئے پولیس کی پٹائی کو غیر قانونی قرار دیا۔ انہوں نے کہا کہ پولیس کسی کی اپیل کو زبردستی نافذ نہیں کرا سکتی یہ پبلک کرفیو یعنی قانون کے حساب سے عوام کو حق دیا گیا ہے، پولیس کو کسی کے ساتھ مارپیٹ کرنا بالکل بے بنیاد اور غیر قانونی ہے، اگر کوئی شہری اپنی ضرورت کو پورا کرنے کی غرض سے گھر سے باہر آتا ہے تو اس میں کسی قانون کی خلاف ورزی نہیں ہوتی۔ ساتھ ہی انہوں نے دوکان کھولنے پر پابندی عائد کرنا یا جرمانہ لگانا بھی پولیس کے دائرہ اختیار سے باہر ہے، کیوںکہ دوکان کھولنا بھی دوکاندار جو کہ عوام کا ہی حصہ ہے اس کو اختیار ہے وہ دوکان کھلی رکھے یا بند رکھے، پولیس کسی کی دوکان پی ایم کی اپیل پر بند نہیں کرا سکتی۔