عوام کو پی ایم مودی کی تقریروں پر بھروسہ نہیں، ہریانہ میں کانگریس کی حکومت بننے جا رہی: کانگریس

کانگریس کے سینئر لیڈر پون کھیڑا نے 14 ستمبر کو میڈیا سے بات کرتے ہوئے ہریانہ اسمبلی انتخاب میں کانگریس کی کامیابی کا دعویٰ کیا۔ انھوں نے کہا کہ ’’ہریانہ میں کانگریس کی حکومت آ رہی ہے۔ اس میں کسی کو شبہ نہیں ہونا چاہیے۔‘‘ انھوں نے مزید کہا کہ وزیر اعظم نریندر مودی آج سے ہریانہ اسمبلی انتخاب کے پیش نظر انتخابی بگُل پھونک رہے ہیں، لیکن ہم ان کی تقریروں کو نہیں سنتے، کیونکہ ان کی تقریروں پر عوام کو بھروسہ نہیں ہے۔

پون کھیڑا نے نامہ نگاروں سے واضح لفظوں میں کہا کہ کانگریس ہریانہ اسمبلی انتخاب پوری طاقت کے ساتھ لڑ رہی ہے اور ہمیں کامیابی ضرور حاصل ہوگی، کانگریس ریاست میں اکثریت حاصل کرے گی اور حکومت تشکیل دے گی۔ انھوں نے ہریانہ کے مسائل کی طرف بھی میڈیا کی توجہ مبذول کی۔ کانگریس لیڈر نے کہا کہ دہلی سے ملحق فرید آباد میں آبی جماؤ کے مسئلہ سے عوام پریشان ہیں۔ یہاں پر آبی جماؤ سے ایک شخص کی موت ہو گئی۔ پون کھیڑا کا کہنا ہے کہ ہریانہ کئی سالوں سے اس طرح کے مسائل سے نبرد آزما ہے۔ یہاں بغیر کسی اصول کے غیر منصوبہ بند تعمیراتی کام چل رہے ہیں۔ بڑے پیمانے پر بدعنوانی اور تجاوزات دیکھنے کو مل رہی ہے۔ ایسا لگتا ہے کہ کوئی بھی اس کی پروا نہیں کرتا، یا اس پر توجہ نہیں دیتا، کیونکہ تجاوزات کے لیے ذمہ دار لوگ حکومت سے جڑے ہوئے ہیں۔

پون کھیڑا نے آئندہ اسمبلی انتخاب میں کانگریس کی کامیابی کا دعویٰ کرتے ہوئے کہا کہ موجودہ حالات کو اب بدلنے کا وقت آ گیا ہے۔ ہماری ہمدردی اس کنبہ کے ساتھ ہے جنھوں نے آبی جماؤ کے دوران اپنا ایک رکن گنوایا ہے۔ قابل ذکر ہے کہ ہریانہ کی 90 نشستوں پر کانگریس، عآپ اور بی جے پی نے اپنے 90-90 امیدوار میدان میں اتارے ہیں۔ 12 ستمبر کو پرچہ نامزدگی داخل کرنے کا عمل پورا ہو چکا ہے۔ ریاست میں 5 اکتوبر کو ووٹنگ ہوگی اور 8 اکتوبر کو نتائج برآمد ہوں گے۔