’دم گھٹنے والی آلودگی سے عوام پریشان، لیکن کیجریوال اور وزیر اعلیٰ آتشی خاموش‘، دہلی حکومت پر کانگریس حملہ آور

نئی دہلی: دہلی ریاستی کانگریس کمیٹی کے صدر دیویندر یادو نے راجدھانی دہلی میں بڑھتی آلودگی پر آج شدید تشویش کا اظہار کیا۔ انہوں نے کہا کہ جہاں کئی اسٹیشنوں پر اے کیو آئی کی خراب ایئر کوالٹی 300-201 درج کی جا رہی ہے، وہیں کچھ اسٹیشنوں پر ایئر کوالٹی 400-301 دیکھی گئی ہے، یعنی حالت انتہائی تشویشناک ہے۔ اے کیو آئی اتنی خطرناک حد پر پہنچ گئی ہے کہ اسپتالوں میں لوگ آنکھوں میں جلن اور سانس لینے میں ہونے والی دقت کی شکایت لے کر بھرتی ہو رہے ہیں۔ 13 مقامات ایسے ہیں جہاں آلودگی سب سے زیادہ ہے۔ ان میں سے 7 مقامات پر ایئر کوالٹی 300 سے زیادہ، جبکہ آنند وہار میں 351 اور منڈکا میں 347 رہی ہے۔

دیویندر یادو کا کہنا ہے کہ گزشتہ کئی سالوں سے عام آدمی پارٹی کی حکومت یہ یقین دلاتی رہی ہے کہ وہ موثر اقدامات کے ذریعہ دہلی کی آلودگی اور جمنا کی گندگی کو ختم کر دے گی۔ حقیقت یہ ہے کہ زمینی سطح پر کوئی کام اب تک نہیں کیا گیا ہے۔ آلودگی پر قابو پانے کے متعلق صرف زبانی دعوے کئے جا رہے ہیں۔ دیوالی سے قبل ہی آلودگی کی وجہ سے لوگوں کی طبیعت خراب ہو رہی ہے۔ ایسے میں جب کل دیوالی کا تہوار ہے تو زہریلی ہوا میں اضافہ کا بہت زیادہ امکان ہے۔ اس کے بارے میں محکمہ موسمیات نے پہلے ہی آگاہ کر دیا ہے۔

دیویندر یادو نے کہا کہ کیجریوال اپنی پد یاترا کے دوران لوگوں سے ملنے سے ڈر رہے ہیں، کہیں انہیں دہلی کی عوام کے غصہ کا سامنا نہ کرنا پڑ جائے۔ پد یاترا کے دوران لوگ ان سے ایسے ایسے سوالات پوچھ رہے ہیں جن کا ان کے پاس کوئی جواب نہیں۔ کیجریوال اپنی پد یاترا میں صرف تعلیم اور صحت کے غیر موجود دہلی ماڈل کے بارے میں باتیں کر رہے ہیں۔ کیجریوال فضائی اور آبی آلودگی کی حقیقت کے بارے میں ایک لفظ بھی نہیں بولتے ہیں۔ آلودگی کے مسائل کو حل کرنے میں عام آدمی پارٹی کی حکومت مکمل طور پر ناکام ثابت ہوئی ہے۔

دہلی کانگریس صدر دیویندر یادو نے کہا کہ دہلی حکومت نے دھول، خستہ حال سڑکوں اور فضائی آلودگی جیسے بنیادی مسائل پر بالکل بھی توجہ نہیں دی ہے۔ جیل سے باہر آنے کے بعد کیجریوال، سسودیا، سنجے سنگھ، موجودہ وزیر اعلیٰ آتشی اور دیگر وزراء نے خستہ حال سڑکوں، دھول اور آلودگی والے علاقوں میں جا کر صرف ڈرامہ کیا تھا۔ اس وقت کیجریوال نے وعدہ کیا تھا کہ تمام خستہ حال سڑکیں دیوالی سے پہلے درست کر دی جائیں گی۔ کیجریوال کا یہ وعدہ بھی دیگر وعدوں کی طرح صرف ایک جملہ ثابت ہوا، اور کاغذوں تک ہی محدود رہا۔