رافیل تو اُڑوا نہیں سکے، اسسٹنٹ مَین نے رافیل کی فائل ہی اُڑوا دی: تیجسوی

پٹنہ: بہار اسمبلی میں اپوزیشن کے لیڈر تیجسوی پرساد یادو نے 36 رافیل لڑاکو طیاروں کی خریداری سے متعلق خفیہ دستاویزات چوری ہوجانے کے مرکزی حکومت کے اعتراف کے سلسلے میں وزیراعظم نریندر مودی پر طنز کرتے ہوئے کہا کہ حفاظت کی آخری گارنٹی چوکیدار نہیں بلکہ تھانے دار دیتا ہے اور عوام تھانے دار ہیں۔

واضح رہے کہ سپریم کورٹ میں رافیل معاملہ پر سماعت کے دوران حکومت نے معلومات دی ہے کہ رافیل کے کچھ کاغذات چوری ہو گئے ہیں۔ اس کے بعد سے حزب اختلاف کی جماعتیں لگاتار مودی حکومت پر نشانہ لگا رہی ہیں۔ اسی سلسلہ میں لالو پرساد یادو کے صاحب زادے تیجسوی یادو نے ٹوئٹ کیا۔

تیجسوی یادو نے مائیکرو بلاگنگ سائٹ ٹوئٹر پر ٹوئٹ کرتے ہوئے کہا ’’حفاظت کی آخری گارنٹی چوکیدار نہیں بلکہ تھانے دار دیتا ہے اور عوام تھانے دار ہیں۔ چوکیدار کی چوری پکڑی گئی اب تھانے دار اسے سزا دے گا۔ رافیل تو اُڑوا نہیں سکے اس لئے اسسٹنٹ مین نے رافیل کی فائل ہی اڑوا دی۔‘‘

واضح رہے سپریم کورٹ نے 14 دسمبر 2018 کو فرانس سے خریدے جا رہے جنگی طیارے رافیل کی خرید کو چیلنج دینے والی تمام عرضداشتیں خارج کر دی گئی تھیں۔ بعد ازاں اس فیصلہ پر نظر ثانی کی عرضی داخل کی گئی۔ اس پر سماعت کے دوران بدھ کو اٹارنی جنرل کے کے وینو گوپال نے بتایا کہ جنگی طیاروں کی خرید سے منسلک دستاویزات وزارت دفاع سے چوری ہو گئے ہیں اور اس کی جانچ چل رہی ہے۔ حالانکہ انہوں نے یہ بھی بتایا کہ ان دستاویزات کی چوری کے معاملہ میں تاحال ایف آئی آر درج نہیں کرائی گئی ہے۔

(یو این آئی ان پٹ کے ساتھ)