بہار: بی جے پی کے سبھی شعبوں کی میٹنگ کل، پٹنہ بھگوا رنگ میں ڈوبا، شاہ-نڈا کا انتظار!

بی جے پی کے سبھی سات محاذوں کی دو دن کی مشترکہ قومی مجلس عاملہ کی میٹنگ ہفتہ سے بہار کی راجدھانی پٹنہ میں ہوگی۔ پٹنہ کے گیان بھون میں ہونے والی اس میٹنگ کے لیے لیڈروں کی آمد شروع ہو گئی ہے۔ پورا شہر بھگوا رنگ میں ڈوبا نظر آ رہا ہے۔ بی جے پی صدر جے پی نڈا اور مرکزی وزیر داخلہ امت شاہ بھی اس میٹنگ میں شامل ہوں گے۔

جے پی نڈا ہفتہ کے روز پٹنہ پہنچیں گے جب کہ وزیر داخلہ امت شاہ اس کے اگلے دن پہنچنے والے ہیں۔ بی جے پی نائب صدر اور ریاستی میڈیا چیف راجیو رنجن نے بتایا کہ بی جے پی صدر جے پی نڈا کے استقبال کے لیے بڑی تعداد میں یوتھ وِنگ کے کارکنان بائک کے ساتھ ان کی قیادت کریں گے۔ نڈا پٹنہ ہائی کورٹ کے پاس بھیم راؤ امبیڈکر کے مجسمہ پر گلپوشی کریں گے اور اس کے بعد ان کا قافلہ جے پی گولمبر تک پہنچے گا۔

راجیو رنجن نے بتایا کہ مجلس عاملہ میں قومی صدر جے پی نڈا اور امت شاہ کی آمد کو لے کر بہار بی جے پی کنبہ کے اراکین کا جوش عروج پر پہنچ چکا ہے۔ انھوں نے کہا کہ مشترکہ مجلس عاملہ کی میٹنگ ملک میں پہلی بار ہو رہی ہے اور بہار کو اس کا انعقاد کرنے کا ذمہ ملا ہے۔ یہی وجہ ہے کہ بہار کے سبھی کارکنان میں اس انعقاد کو لے کر غضب کا جوش دیکھنے کو مل رہا ہے۔

راجیو رنجن کا دعویٰ ہے کہ سبھی کارکنان آگے بڑھ کر باہر سے آنے والے عہدیداران کے لیے اپنے یہاں رہائش تک کا انتظام کر رہے ہیں تاکہ کسی کو تکلیف نہ ہو۔ انھوں نے کہا کہ 30 جولائی کو 11 بجے پٹنہ پہنچنے کے بعد پارٹی صدر نڈا کا کوئی مقامات پر استقبال کیا جائے گا، جس میں یوتھ وِنگ کے ہزاروں کارکنان موٹر سائیکلوں کے ساتھ رہیں گے۔ اس کے بعد نڈا ’گرام سنسد‘ پروگرام میں شرکت کریں گے، پھر سہ پہر 3.30 بجے وہ گیان بھون میں ایک نمائش کا افتتاح کریں گے۔ اس کے بعد وہ مشترکہ محاذ کی قومی مجلس عاملہ کی میٹنگ کا افتتاح کریں گے۔ راجیو رنجن نے بتایا کہ 31 جولائی کو نڈا پٹنہ بی جے پی ریاستی دفتر سے 16 اضلاع میں تیار بی جے پی ضلعی دفاتر کا افتتاح اور 7 اضلاع میں عمارت تعمیر کا سنگ بنیاد کریں گے۔ اس دن مشترکہ محاذ کے قومی مجلس عاملہ کی اختتامی تقریب میں صدر نڈا کے ساتھ وزیر داخلہ امت شاہ بھی حصہ لیں گے۔ سابق رکن اسمبلی رجیو رنجن کا کہنا ہے کہ شام کو دونوں سرکردہ لیڈران پارٹی دفتر پہنچیں گے جہاں وہ کچھ میٹنگوں میں شامل ہوں گے۔

بی جے پی ریاستی نائب صدر نے کہا کہ اس بڑی تقریب کو لے کر بہار بی جے پی کے سبھی لیڈر اور کارکنان جوش کے ساتھ لگے ہوئے ہیں۔ اس کام کے لیے پارٹی کے ذریعہ 24 کمیٹیاں تشکیل دی گئی ہیں، جن کے کاموں کی بی جے پی ریاستی صدر ڈاکٹر سنجے جیسوال، شریک انچارج ہریش دویدی، تنظیمی جنرل سکریٹری بھیکھو بھائی دلسانیا اور دیگر سینئر لیڈران کے ذریعہ لگاتار جائزہ کیا جا رہا ہے۔