پاکستان نے پھر کی ناپاک حرکت، سرحد پر گولہ باری میں رہائشی مکانات کو نقصان

دنیا بھر میں اس وقت کورونا وبا کا قہر ہے اور اس وبا پر قابو پانے کے لیے سبھی ممالک مصروف ہیں۔ لیکن ایسے وقت میں بھی پاکستان سرحد پر اپنی ناپاک حرکتوں سے باز نہیں آ رہا ہے۔ ایک طرف جہاں پاکستان جموں و کشمیر میں دہشت گردی کو فروغ دے رہا ہے، وہیں دوسری طرف سرحد پر پاکستانی فوجیوں کی جانب سے جنگ بندی کی خلاف ورزی لگاتار جاری ہے۔

جموں وکشمیر کے ضلع پونچھ میں لائن آف کنٹرول (ایل او سی) کے بالاکوٹ سیکٹر پر منگل کی صبح ہندوستان اور پاکستان کی افواج کے درمیان گولہ باری کا تبادلہ ہوا جس میں سرحد کے قریب کچھ رہائشی ڈھانچوں کو نقصان پہنچنے اور کئی مویشیوں کے ہلاک ہونے کی خبریں ہیں۔ دفاعی ترجمان کرنل دیویندر آریہ نے اس سلسلے میں بتایا کہ پاکستانی فوج نے منگل کی صبح ضلع پونچھ میں ایل او سی کے بالاکوٹ سیکٹر میں ہندوستانی فوج کی چوکیوں اور آبادی والے علاقوں کو نشانہ بناکر فائرنگ کی اور مارٹر گولے داغے۔

دفاعی ترجمان کرنل دیویندر آریہ کا کہنا ہے کہ ایل او سی کی حفاظت پر مامور فوجی اہلکار پاکستانی فائرنگ اور مارٹر شیلنگ کا موثر اور منہ توڑ جواب دے رہے ہیں۔ ایک رپورٹ کے مطابق پاکستانی فائرنگ اور مارٹر شیلنگ کی وجہ سے کچھ رہائشی ڈھانچوں کو نقصان پہنچنے کے علاوہ کئی مویشی بھی ہلاک ہوگئے ہیں۔ تاہم کسی انسانی جان کے نقصان کی کوئی اطلاع نہیں ہے۔

قابل ذکر ہے کہ طرفین کے درمیان سال 2003 میں جنگ بندی معاہدہ طے ہونے کے باوصف بین الاقوامی سرحد ہو یا ایل او سی کوئی بھی دن گولہ باری یا فائرنگ کے تبادلے کے بغیر نہیں گزرتا ہے جس سے سرحد کے آرپار کی بستیوں کے لوگوں کا جینا حرام ہو کے رہ گیا ہے۔