پاکستان: بلوچستان میں اندھادھند فائرنگ، بسوں سے اتار کر لوگوں پر برسائی گئیں گولیاں، 23 افراد ہلاک

پاکستان کے بلوچستان واقع موسیٰ خیل ضلع میں آج سر عام گولیوں سے بھون کر تقریباً دو درجن افراد کو ہلاک کر دیا گیا۔ میڈیا رپورٹس کے مطابق موسیٰ خیل میں کچھ مسلح افراد نے ٹرکوں اور بسوں کو روک کر پہلے مسافروں کو اتارا اور پھر ان کی پہچان کرنے کے بعد ان پر اندھا دھند فائرنگ شروع کر دی۔ اس حملے میں کم از کم 23 افراد کے ہلاک ہونے کی تصدیق ہو چکی ہے۔

پاکستانی حکومت کی ترجمان عظمیٰ بخاری نے کہا کہ موسیٰ خیل حملہ پنجاب کے لوگوں کو ہدف بنا کر کیا گیا ہے۔ اسی طرح کا حملہ تقریباً چار ماہ قبل ہوا تھا۔ اپریل ماہ کی بات ہے جب نوشکی کے پاس ایک بس سے 9 مسافروں کو اتار دیا گیا تھا اور ان کے شناختی کارڈ دیکھنے کے بعد گولی مار کر ان کا قتل کر دیا گیا تھا۔ سینئر پولیس سپرنٹنڈنٹ ایوب کھوسو نے بتایا کہ ایک ممنوعہ گروپ کے دہشت گردوں نے موسیٰ خیل ضلع کے راراشم علاقہ میں ایک شاہراہ کو رخنہ انداز کر دیا اور 23 مسافروں کو بس سے اتارا۔ بہرحال، انھوں نے یہ نہیں بتایا کہ ان کا تعلق کس تنظیم سے ہے۔

موسیٰ خیل کے اسسٹنٹ کمشنر نجیب کاکر کا کہنا ہے کہ مسلح افراد نے نہ صرف لوگوں پر گولیاں برسائیں، بلکہ انھوں نے 10 گاڑیوں کو نذر آتش بھی کر دیا۔ انھوں نے بتایا کہ پولیس موقع پر پہنچ گئی ہے اور لاشوں کو اسپتال پہنچانا شروع کر دیا ہے۔ بلوچستان کے وزیر اعلیٰ سرفراز بگتی نے اس حادثہ کی شدید الفاظ میں مذمت کی ہے۔ انھوں نے اس حملے میں ہلاک لوگوں کے کنبوں کے تئیں اظہار تعزیت بھی کیا ہے۔