’ہماری حکومت بنے گی، پھر سب کی فائلیں کھلیں گی‘، دسہرا کی ریلی میں آدتیہ ٹھاکرے نے شندے حکومت پر کیا حملہ

مہاراشٹر میں اسمبلی انتخاب کی تاریخ کا اعلان بھلے ہی نہیں ہوا ہے، لیکن سیاسی سرگرمیاں اپنے عروج پر ہیں۔ اس درمیان شیوسینا یو بی ٹی گروپ کے لیڈر آدتیہ ٹھاکرے نے دسہرا کی ایک ریلی سے خطاب کرتے ہوئے وزیر اعلیٰ ایکناتھ شندے کو شدید الفاظ میں تنقید کا نشانہ بنایا۔ انھوں نے کہا کہ شندے حکومت اس ریاست کو فروخت کرنے جا رہی ہے۔ اس ریاست کو بچانے کے لیے ہمیں ساتھ آنا ہوگا اور اتحاد کا مظاہرہ کرنا ہوگا۔

دادر کے شیواجی پارک میں منعقد دسہرا ریلی سے خطاب کرتے ہوئے آدتیہ ٹھاکرے نے کہا کہ ایکناتھ شندے نے بدعنوانی کر مہاراشٹر کو خوب لوٹا ہے۔ اے سے زیڈ تک سبھی بدعنوان ہیں۔ اس بدعنوان حکومت کو ختم کرنا ہے اور ایک مہینے کے بعد ہماری حکومت بنے گی تو سبھی کی فائل کھولی جائے گی۔ آدتیہ نے مزید کہا کہ ریاست میں دو انتہائی بڑے گھوٹالے ہوئے ہیں۔ گزشتہ سال میں نے سڑک گھوٹالہ کا انکشاف کیا تھا۔ اس وقت میں نے وزیر اعظم سے کہا تھا کہ آپ کا نام بدنام ہو جائے گا، آپ کے ہاتھوں سے افتتاح کرنے سے بھی یہ کام کبھی پورے نہیں ہوں گے۔ یہ ایک گھوٹالہ تھا۔ میونسپل کارپوریشن کو متفق ہونا پڑا۔ اس سے ایک ہزار کروڑ روپے کی بچت ہوئی۔

آدتیہ ٹھاکرے نے اپنی تقریر کے دوران کہا کہ 6 ہزار کروڑ روپے کا گھوٹالہ ہوا ہے، لیکن ایک مہینے میں ہماری حکومت آ جائے گی۔ میں انتظار کر رہا ہوں، حکومت آئے گی تو سب کی فائل نکالی جائے گی۔ چاہے آپ وزیر ہوں یا کوئی اور۔ ہم اس لوٹ کو روکیں گے۔ انھوں نے مزید کہا کہ چھترپتی شیواجی کی مورتی کو بھی نہیں بخشا گیا۔ اس میں بھی بدعنوانی تھی۔ اس واقعہ کو ریاستی عوام کبھی نہیں بھولے گی، اس حکومت کو معافی نہیں کرے گی۔