ایشور ہی جانتا ہے کہ تمل ناڈو میں وبا کب ختم ہوگی:پالانی سوامی

تمل ناڈو کے وزیراعلی ای کے پالانی سوامی نے کہا ہے کہ چنئی اور تین اضلاع میں 12 دنوں کا مکمل لاک ڈاؤن لوگوں کو تکلیف پہنچانے کےلئے نہیں بلکہ کورونا وائرس کے پھیلاو کو روکنے کے لئے کیا گیا ہے اور ایشور ہی جانتا ہے کہ ریاست میں اس وبا کا خاتمہ کب ہوگا۔

پلانی سوامی نے آج شہر کے ایک کالج میں 350 بستروں والی کووڈ کیئر سہولت کا معائنہ کرنے کے بعد صحافیوں سے کہا ’’ہم وائرس کے پھیلاؤ کو روکنے اور لوگوں کو محفوظ رکھنے کےلئے ہر ممکن کوششیں کررہے ہیں‘‘۔

انہوں نے کہا کہ کوووڈ۔ 19 ایک نئی بیماری ہے جس کا ابھی کوئی علاج نہیں ہے۔ طبی ماہرین کا کہنا ہے کہ کورونا سے متاثرہ مریضوں کے علاج کی کوئی دوا تیار نہیں ہوئی ہے۔

یہ پوچھے جانے پر کہ کورونا وبا کا خاتمہ کب ہوگا، مسٹر پالانی سوامی نے کہا کہ ’’یہ ایک نئی بیماری ہے جس کا ابھی تک کوئی علاج نہیں ہے۔ لیکن ہم مریضوں کا علاج کررہے ہیں اور اس سے ٹھیک ہونے کی شرح 54 فیصد ہے‘‘۔

انہوں نے کہا کہ یہ وائرس تمل ناڈو میں بیرونی ممالک اور دیگر ریاستوں سے داخل ہوا ہے۔ حکومت اس سے نمٹنے کی مقدور بھر کوششیں کررہی ہے۔ بیماری پھیلنے کے باوجود ڈاکٹر، نرس اور طبی اہلکاروں کی مسلسل کوششوں کے سبب ریاست میں بیماری سے نجات پانے کی شرح 54 فیصد ہے۔