لاک ڈاؤن کے دور میں آن لائن شادی! ویڈیو کانفرنسنگ کے ذریعے دو بہنوں کا نکاح

کورونا وائرس کی وجہ سے ملک بھر میں لاک ڈاؤن جاری ہے اور لوگ وائرس کے خوف سے گھروں میں قید رہنے کو مجبور ہیں۔ حکومت اس سے نمٹنے کے لئے ہر ممکن کوشش کر رہی ہے۔ اسی دوران کچھ خبریں اور کہانیاں ایسی بھی ہیں جو لوگوں کے چہروں پر مسکراہٹیں لا رہی ہیں۔ ایسے ہی ایک معاملہ میں معاشرتی دوری (سوشل ڈسٹینسگ) پر عمل پیرا رہتے ہوئے آن لائن طریقہ سے نکاح پڑھایا گیا ہے۔

یہ واقعہ بہار کے بیگوسرائے میں رونما ہوا۔ یہاں سگی بہنوں کا آن لائن طریقہ سے نکاح پڑھایا گیا ہے۔ یہ آن لائن نکاح لوگوں میں موضوع بحث بنا ہوا ہے کیوں کہ مولوی صاحب نے لیپ ٹاپ کی اسکرین کے سامنے بیٹھ کر نکاح پڑھایا۔ اس دوران مولانا، گواہ اور وکیل لیپ ٹاپ کے سامنے بیٹھے اور ویڈیو کانفرنسنگ کے ذریعے دونوں بہوں کا نکاح پڑھایا گیا۔ دلہنوں نے لیپ ٹاپ کے سامنے ہی نکاح قبول کرایا۔

اطلاعات کے مطابق بہار کے چھوٹی بلیا مد ہٹولی کے رہائشی محمد ولی احمد قریشی عرف چھوٹے کی دو بیٹیوں نغمہ پروین اور راحت پروین کی شادی 25 مارچ کو ہونا قرار پائی تھی لیکن اسی دوران کورونا نے خطرناک صورت اختیار کر لی اور اس کے پیش نظر 21 دن کا ملک گیر لاک ڈاؤن نافذ ہو گیا۔

لاک ڈاؤن کی خلاف ورزی بھی نہ ہو اور بیٹیوں کا نکاح بھی مکمل ہو جائے اس کے لئے لڑکا اور لڑکی دونوں فریقین نے یہ فیصلہ کیا کہ نکاح تو ہوگا لیکن نہ تو بارات آئے گی اور نہ ہی لوگوں کی بھیڑ جمع ہوگی۔ اس کے تحت 25 مارچ کی شام محمد ولی احمد قریشی عرف چھوٹے کی بڑی بیٹی نغمہ کا نکاح نالندہ ضلع کے محمد شمشاد اور دوسری بیٹی راحت پروین کا نکاح ضلع گیا کے شاہنواز عالم سے آن لائن طریقہ سے مکمل کرایا گیا۔