لالو یادو کے 75ویں یومِ پیدائش پر خاص انداز میں کاٹا گیا 75 کلو کا لڈو

راشٹریہ جنتا دل (آر جے ڈی) سربراہ اور بہار کے سابق وزیر اعلیٰ لالو پرساد یادو ہفتہ کو اپنا 75واں یوم پیدائش منا رہے ہیں۔ اس موقع پر آر جے ڈی کارکنان میں خوب جوش و خروش دیکھنے کو ملا۔ پٹنہ میں سابق وزیر اعلیٰ رابڑی دیوی کی رہائش پر رات کو 12 بجے کیک کاٹا گیا اور پھر ہفتہ کو آر جے ڈی دفتر میں 75 کلوگرام کا لڈو خاص انداز میں کاٹا گیا۔ آر جے ڈی سربراہ کے یومِ پیدائش پر پٹنہ کی سڑکوں کے کنارے نیک خواہشات والے بڑے بڑے پوسٹر اور بینر بھی لگائے گئے۔

لالو پرساد کے یومِ پیدائش کے پیش نظر رابڑی دیوی کے رہائشی احاطہ میں شجرکاری بھی کی گئی۔ آر جے ڈی سربراہ کو ان کے بیٹے تیجسوی یادو، تیج پرتاپ یادو، بیٹی ڈاکٹر میسا بھارتی سمیت دیگر لوگوں نے انھیں یومِ پیدائش کے موقع پر مبارکباد پیش کی۔ آر جے ڈی لیڈروں اور کارکنان نے لالو پرساد کے یوم پیدائش کو سماجی انصاف اور یوم خیر سگالی کے طور پر منایا۔ میسا بھارتی نے اپنے آفیشیل ٹوئٹر ہینڈل سے ٹوئٹ کر لکھا کہ ’’انسان آئیں گے، جائیں گے، لیکن جو سماجی انصاف کی ناقابل فراموش اور مضبوط وراثت بن کر ہر کمزور کی زبان پر سدا کے لیے سج جائیں گے، وہی لالو جی کہلائیں گے۔ یومِ پیدائش کی مبارکباد پاپا۔‘‘

ہفتہ کے روز لالو پرساد دوپہر دونوں بیٹوں تیج پرتاپ اور تیجسوی کے ساتھ آر جے ڈی دفتر بھی پہنچے۔ یہاں کارکنان نے ان کا زوردار استقبال کیا۔ اس موقع پر آر جے ڈی صدر نے 75 کلو کا لڈو خاص انداز میں کاٹا اور لوگوں کو کھلایا۔ اس موقع پر ’غریبوں کے مسیحا‘ نامی کتاب کا اجراء بھی کیا گیا۔