دیوالی کے موقع پر گوپال رائے کی دہلی والوں سے اپیل، ’پٹاخے نہ چلائیں، ماحول کو محفوظ رکھیں‘

نئی دہلی: ہندوستان بھر میں آج دیوالی کا تہوار بھرپور جوش و خروش کے ساتھ منایا جا رہا ہے۔ اسی مناسبت سے دہلی کے وزیر ماحولیات گوپال رائے نے دہلی والوں کو دیوالی کی مبارکباد دی اور ساتھ ہی ماحول کی حفاظت کے لیے ایک اہم اپیل بھی کی۔ انہوں نے کہا کہ دیوالی خوشیوں کا تہوار ہے اور اس موقع پر سب لوگ دیے جلائیں، مٹھائیاں بانٹیں اور اپنے پیاروں کے ساتھ یہ تہوار منائیں لیکن پٹاخے چلانے سے اجتناب کریں۔

گوپال رائے نے کہا، ’’ہم سب کی ذمہ داری ہے کہ ہم ماحول کا خیال رکھیں۔ دیوالی کے موقع پر اگر ہم پٹاخے نہیں چلائیں گے تو ماحول میں موجود آلودگی بھی کم ہوگی اور یہ ہمارے بزرگوں اور بچوں کے لیے بہتر ہوگا۔‘‘ انہوں نے اس موقع پر دیے جلانے کی روایت کو فروغ دیتے ہوئے کہا، ’’جس طرح سے ہمارے بڑوں نے دیے جلا کر دیوالی منائی تھی، ہمیں بھی اسی طرح دیے جلا کر یہ خوشی منانی چاہیے۔‘‘

گوپال رائے نے دہلی میں آلودگی کی موجودہ صورتحال کا ذکر کرتے ہوئے کہا کہ دہلی کے شہریوں کی یہ ذمہ داری بنتی ہے کہ وہ آلودگی کو کم کرنے میں اپنا کردار ادا کریں۔ انہوں نے کہا، ’’چاہے وہ دھول کی آلودگی ہو یا گاڑیوں کا دھواں، سب کو مل کر ان عوامل کو کنٹرول کرنے کی کوشش کرنی چاہیے کیونکہ آلودگی ہماری زندگیوں پر براہ راست اثر ڈالتی ہے۔‘‘

انہوں نے مزید کہا کہ دیوالی کے جشن میں ہم سب کو مل جل کر ایک دوسرے کی زندگیوں کو محفوظ بنانے کی کوشش کرنی چاہیے، نہ کہ پٹاخے چلا کر انہیں خطرے میں ڈالنا چاہیے۔ اس موقع پر گوپال رائے نے ایک مثال پیش کرتے ہوئے کہا کہ جب ہم ماحول کے تحفظ کے لیے خود قدم اٹھاتے ہیں، تو دوسرے لوگ بھی اس سے متاثر ہوتے ہیں اور یہی شعور ہمیں دہلی میں پھیلانے کی ضرورت ہے۔

مزید برآں، گوپال رائے نے دہلی میونسپل کارپوریشن (ایم سی ڈی) کے ملازمین کی تنخواہوں کی ادائیگی پر بی جے پی کو تنقید کا نشانہ بنایا۔ انہوں نے کہا کہ بی جے پی نے 15 سال تک دہلی میونسپل کارپوریشن پر کنٹرول رکھا، لیکن اس عرصے میں ملازمین کو وقت پر تنخواہیں نہیں ملتی تھیں، جس کی وجہ سے اکثر ملازمین کو احتجاج کرنا پڑتا تھا اور دہلی میں جگہ جگہ کچرا جمع ہو جاتا تھا۔ عام آدمی پارٹی کی حکومت نے آ کر ایم سی ڈی ملازمین کو وقت سے پہلے تنخواہیں دینے کا عمل شروع کیا، جس سے لوگوں کی سہولیت میں اضافہ ہوا ہے۔

گوپال رائے نے عوام سے اپیل کی کہ وہ دیوالی کے جشن کو ماحول دوست طریقے سے منائیں اور اپنی آنے والی نسلوں کے لیے ایک صاف و شفاف دہلی کا خواب پورا کرنے میں اپنا کردار ادا کریں۔