تیل کی قیمتوں میں اضافہ اور بڑھتی شرح سود معیشت کے لیے خطرہ: موڈیز

موڈیز انویسٹرس سروس نے بدھ کے روز کہا ہے کہ زیادہ تر ہندوستانی اور بیرون ملک سرمایہ کاروں کا ماننا ہے کہ تیل کی بڑھی ہوئی قیمتیں ملک کی معیشت کے لیے ایک خطرہ بن کر اُبھرا ہے۔ امریکی ریٹنگ ایجنسی کی یہ رپورٹ اس سال جون میں ممبئی اور سنگاپور میں ہوئے سالانہ انڈیا کریڈٹ کانفرنس میں شامل 100 سے زیادہ مالیاتی اداروں سمیت 175 شرکاء پر مبنی ہے۔

دراصل سرمایہ کاروں سے ہندوستانی معیشت کے بڑے خطرات، سرکاری خزانہ کو ہو رہے خسارہ، پبلک سیکٹر کے بینکوں کے لیے از سر نو پونجی کاری پیکیج، ہندوستانی کارپوریشنوں کے لیے کریڈٹ حالات سمیت دیگر سوالات پوچھے گئے تھے۔ موڈیز کے ڈپٹی چیئرمین جوئے رینکوتھیز نے جاری رپورٹ میں کہا ہے کہ ’’سنگاپور میں زیادہ تر شرکاء نے تیل کی بڑھتی قیمتوں کو سب سے بڑا خطرہ بتایا ہے جب کہ 30.3 فیصد لوگوں نے بڑھتی شرح سود کو دوسرا بڑا خطرہ بتایا۔ ممبئی میں 23.1 فیصد لوگوں نے گھریلو سیاسی خطرے کو دوسرا سب سے بڑا خطرہ قرار دیا۔‘‘

سوالوں کے جوابات دینے والوں میں زیادہ تر لوگوں نے کہا کہ ہندوستان موجودہ مالی سال میں جی ڈی پی کے 3.3 فیصد سرکاری خزانہ کے خسارہ کا ٹارگیٹ حاصل نہیں کر سکے گا۔ اس کے علاوہ سنگاپور میں صرف 23.3 فیصد اور ممبئی میں صرف 13.6 فیصد سرمایہ کاروں نے اعتراف کیا کہ مالی ٹارگیٹ حاصل کیا جا سکتا ہے جب کہ ممبئی میں 84.7 فیصد اور سنگاپور میں 76.7 فیصد سرمایہ کاروں نے کچھ مالی گراوٹ کی طرف اشارہ کیا۔

بینکوں کے از سر نو پونجی کاری کے حکومت کے منصوبہ پر سنگاپور میں 85.7 فیصد اور ممبئی میں 93.6 فیصد سرمایہ کاروں کا ماننا ہے کہ یہ این پی اے بینکوں کے خراب قرض کی چیلنج سے نمٹنے میں اہل نہیں ہے۔ اسی سلسلے میں 59.6 فیصد لوگوں نے ممبئی میں اور 32.1 فیصد لوگوں نے سنگاپور میں اعتراف کیا کہ بینک بازار سے پونجی پیدا کرنے میں اہل نہیں ہے۔