یو پی: جیل احاطے میں افسران اور ملازمین کے موبائل استعمال پر پابندی عائد

لکھنؤ: اترپردیش حکومت نے جیل احاطے میں جیل سپرنٹنڈنٹ اور جیلر کے علاوہ تمام ہی افسران کے موبائل استعمال پر پابندی لگا دی ہے۔

انسپکٹر جنرل آف پولس (جیل) آنند کمار نے بدھ کو یہاں بتایا کہ جیل احاطے میں صرف جیل سپرنٹنڈنٹ اور جیلر کے سی یو جی نمبر کو چھوڑ کر باقی سبھی افسران و ملازمین کے لئے موبائل استعمال کو ممنوع قرار دیا گیا ہے۔ انہوں نے کہا کہ جن جیلوں میں معائنے کے دوران موبائل کا استعمال کرتے ہوئے ملازم پائے جائیں گے ان کے خلاف سخت کاروائی کی جائے گی۔

انہوں نے بتایا کہ یہ نظام جیلوں میں ’’ورک کلچر‘‘ میں بہتری لانے کے لئے کیا گیا ہے۔ اب ریاست کی جیلوں میں قیدی غیر قانونی طور سے موبائل کا استعمال نہیں کرسکیں گے۔ جو قیدی موبائل فون کا استعمال کرتے ہوئے پائے جائیں گے ان کے خلاف سخت کاروائی کی جائے گی۔

کمار نے بتایا کہ جیل میں موبائل فون کے غیر قانونی استعمال کو روکنے اور قیدیوں کے اپنے اہل خانہ سے بات کر نے کے لئے پی سی او قائم کیے گئے ہیں۔ قیدی اپنے اہل خانہ اور وکیل سے اس پی سی او کے ذریعہ ہفتے میں ایک بار پانچ منٹ تک بات کرسکتے ہیں۔ اس کے لئے قیدیوں کو دو فون نمبر جیل میں دستیاب کرانے ہوں گے۔ پولس کے ذریعہ ان نمبرات کی تصدیق کے بعد قیدی اپنے اہل خانہ سے بات کرسکیں گے۔

ڈائریکٹر جنرل نے بتایا کہ ان کے علم میں یہ بات آئی ہے کہ محکمہ پولس کی جانب سے تصدیق کے لئے بھیجے گئے قیدیوں کے کاغذات کافی تاخیر کے ساتھ جیل سپرنٹنڈنٹ کو لوٹائے جاتے ہیں جس کی وجہ سے قیدی تصدیق سے قبل ہی جیل سے رہا ہو جاتا ہے۔