ماحولیات کارکن دشا روی کی گرفتاری کے خلاف این ایس یو آئی کا احتجاجی مظاہرہ

نئی دہلی: گریٹا تھنبرگ ٹول کٹ معاملہ میں گرفتار ہونے والی ماحولیات کارکن دشا روی کی گرفتاری کے خلاف این ایس یو آئی (نیشنل یونین آف اسٹوڈنٹ آرگنائزیشن) نے بدھ کے روز مظاہرہ کیا اور دشا روی کو رہا کرنے کا مطالبہ کیا۔ مظاہرہ کے دوران پولیس نے متعدد کارکنان کو حراست میں لے لیا۔

این ایس یو آئی سے موصول ہونے والے ایک پریس بیان کے مطابق دشا روی کی گرفتاری کے خلاف طلبہ تنظیم (این ایس یو آئی) نے دہلی میں پر امن مظاہرہ کرنے پر این ایس یو آئی کے صدر نیرج کندن، ستویر سنگھ، حسین سلطانیہ، شوریہ ویر چودھری، کنال سہراوت، ارجن چپرانا، روہت رانا سمیت متعدد کارکنان کو حراست میں لے لیا۔

این ایس یو آئی کے بیان میں کہا گیا کہ ’’21 سالہ دشا روی ماحولیات کارکن ہونے کے علاوہ سماجی مسائل پر بھی اپنی رائے پیش کرتی ہے۔ اسی طرح انہوں نے کسانوں کی تحریک کی بھی حمایت کی اور یہ بات حکومت کو برداشت نیہں ہوئی اور انہیں گرفتار کر لیا گیا۔‘‘

بیان میں مزید کہا گیا، ’’این ایس یو آئی دشا روی کی گرفتاری کی مخالفت کرتی ہے اور وزیر اعظم مودی سے مطالبہ کرتی ہے کہ آپ ہٹلر کے راستہ پر نہ چلیں۔ اگر آپ نے ہٹلر کے راستہ پر چل کر اس ملک کے نوجوانوں کو خاموش کرنے کی کوشش کی تو ملک کا نوجوان طبقہ آپ کی حکومت کو اکھاڑ پھینکنے میں زیادہ دیر نہیں لگائے گا۔‘‘