اب ہریدوار میں ہوئی ٹرین کو دھماکہ سے اڑانے کی سازش، دہرادون میں ریلوے ٹریک پر ڈیٹونیٹر برآمد

شر پسند عناصر کے ذریعہ ریلوے ٹریک پر پتھر یا دیگر چیزیں رکھ کر ٹرین کو پلٹنے کی سازش لگاتار کی جا رہی ہے۔ تازہ معاملہ اتراکھنڈ کے ہریدوار کا ہے جہاں ٹرین کو دھماکہ سے اڑانے کی بڑی سازش کو ناکام بنا دیا گیا۔ میڈیا رپورٹس کے مطابق شر پسند عناصر نے ہریدوار-دہرادون ریلوے ٹریک پر ڈیٹونیٹر پلانٹ کر دیا تھا، لیکن وقت پر اس کی خبر سیکورٹی ایجنسیوں کو مل گئی۔ فوری کارروائی کرتے ہوئے ایجنسیوں نے ڈیٹونیٹر کو برآمد کیا اور پورے معاملے کی تحقیقات شروع کر دی۔

واقعہ ہریدوار کے موتی چور ریلوے اسٹیشن کے پاس کا ہے۔ اس معاملے میں سیکورٹی ایجنسیوں نے اتر پردیش کے رامپور باشندہ ایک شخص کو حراست میں بھی لیا ہے۔ مقامی سیکورٹی ایجنسیوں کے ساتھ ساتھ مرکزی ایجنسیاں بھی اس معاملے کی جانچ میں مصروف ہو گئی ہیں۔ جس نوجوان کو حراست میں لیا گیا ہے، اس کا نام اشوک بتایا جا رہا ہے اور اندیشہ ہے کہ اسی نے یہ ڈیٹونیٹر پلانٹ کیا ہے۔

پولیس ذرائع کے مطابق ریلوے ٹریک پر ڈیٹونیٹر رکھے جانے کی خبر ملتے ہی ہنگامہ برپا ہو گیا۔ آناً فاناً مقامی پولیس سے لے کر دیگر سیکورٹی ایجنسیاں حرکت میں آ گئیں۔ اسی دوران سی سی ٹی وی کیمرے میں ایک نوجوان ریلوے ٹریک پر مشتبہ حالت میں گھومتے ہوئے دکھائی دیا۔ پولیس نے فوراً نوجوان کی شناخت کی اور اسے حراست میں لے لیا۔ اب اس سے پوچھ تاچھ کی جا رہی ہے۔

میڈیا رپورٹس کے مطابق جی آر پی ہریدوار کا کہنا ہے کہ مراد آباد ریلوے ڈویژن کے کنٹرول روم سے اس ڈیٹونیٹر کے بارے میں خبر ملی تھی۔ اس میں بتایا گیا تھا کہ موتی چور ریلوے اسٹیشن کے پاس ریلوے ٹریک پر ڈیٹونیٹر پلانٹ کیا گیا ہے۔ اس خبر کے بعد جی آر پی دستہ موقع پر پہنچا اور ڈیٹونیٹر برآمد کر اسے ناکارہ بنایا۔