اب اتر پردیش کے اسکولوں میں بچوں کو بتائی جائیں گی سرکاری منصوبوں کی خوبیاں، گائیڈلائن جاری

اتر پردیش کی یوگی حکومت نے سرکاری مڈل اسکولوں کے لیے ایک خاص گائیڈ لائن جاری کیا ہے۔ اس گائیڈ لائن کے مطابق اسکولوں میں اب بچوں کو مرکزی و ریاستی حکومت کے منصوبوں کو جانکاری دی جائے گی۔ اس سلسلے میں مڈل ایجوکیشن ڈائریکٹر کی طرف سے حکم جاری کیا گیا ہے کہ رواں تعلیمی اجلاس سے گائیڈلائن پر عمل کیا جائے۔ محکمہ کی طرف سے وقتاً فوقتاً اسکولوں میں جاری سرگرمیوں کا جائزہ بھی لیا جائے گا۔ کلاسز شروع ہونے سے پہلے کئی طرح کے پروگرام ریاستی مڈل اسکولوں کے لیے لازمی کر دیا گیا ہے۔

میڈیا رپورٹس کے مطابق جو گائیڈلائن جاری کیا گیا ہے اس کے مطابق روزانہ 15 منٹ کے لیے مڈل اسکولوں میں دعائیہ اجلاس کا انعقاد ہوگا جس میں عزائم، بہتر خیالات، سوال و جواب، اہم خبریں اور قومی ترانہ وغیرہ کو شامل کیا جائے گا۔ ساتھ ہی ملک کو فخر کا موقع فراہم کرنے والے نئے واقعات کے بارے میں بھی طلبا کو جانکاری دی جائے گی۔

بتایا جاتا ہے کہ گائیڈلائن کے مطابق بہتر خیالات، اہم خبروں اور سوال و جواب اسکول کے نوٹس بورڈ پر ہر روز الگ الگ طالب علم سے لکھوایا جائے گا۔ علاوہ ازیں ’نیا سویرا‘ پروگرام کے تحت ہفتہ میں 2 ایجوکیشن افسر اسکولوں میں طلبا کو زندگی کے اقدار، ڈسپلن، کیریئر، روز مرہ کے معمولات سمیت کئی دیگر اہم امور پر اپنی بات رکھیں گے۔ پروگرام میں اسکول کے پرانے طلبا اور مختلف شعبوں میں کامیاب اشخاص کو بھی بچوں سے گفتگو کرنے کے لیے مدعو کیا جائے گا۔

اتر پردیش کے سبھی سرکاری اسکولوں میں مرکزی حکومت اور ریاستی حکومت کے اہم منصوبوں مثلاً سُکنیا سمردھی یوجنا، مکھیہ منتری ابھیودے یوجنا، مکھیہ منتری بال سیوا وغیرہ کی جانکاری طلبا کو دی جائے گی۔ ان سبھی پروگراموں کو 15 منٹ کے دعائیہ اجلاس میں مستقل طور پر روزانہ کیا جانا ہے۔ ساتھ ہی بتایا گیا ہے کہ آئندہ دسویں اور بارہویں بورڈ کے امتحان مراکز پر ’میک اِن انڈیا‘ کی جھلک بھی دیکھنے کو ملے گی۔ امتحان مراکز پر امتحان کی مانیٹرنگ کے لیے جو بھی مشینیں لگائی جائیں گی وہ سودیشی ہوں گی۔ اس سلسلے میں بھی حکم جاری کیا جا چکا ہے۔