وائناڈ ہی نہیں، ناندیڑ لوک سبھا سیٹ پر بھی کانگریس کی ہوئی فتح، آخری راؤنڈ میں ہوا الٹ پھیر!

رواں ماہ جن 2 پارلیمانی سیٹوں پر ضمنی انتخاب ہوا تھا، ان میں وائناڈ کے ساتھ ساتھ مہاراشٹر کی پارلیمانی سیٹ ناندیڑ بھی شامل ہے۔ ان دونوں ہی پارلیمانی سیٹوں پر کانگریس نے فتح کا پرچم لہرایا ہے۔ پہلے تو وائناڈ سیٹ سے کانگریس جنرل سکریٹری پرینکا گاندھی نے تقریباً 4.11 لاکھ ووٹوں سے تاریخی فتح حاصل کی، اور اب خبریں سامنے آ رہی ہیں کہ ناندیڑ سیٹ پر ڈالے گئے ووٹوں کی گنتی کے دوران آخری راؤنڈ میں بڑا الٹ پھیر ہوا اور کانگریس امیدوار رویندر وسنت راؤ چوہان نے جیت حاصل کر لی۔

دراصل الیکشن کمیشن کی ویب سائٹ پر بہت دیر تک بی جے پی امیدوار سنتوک راؤ ہمبرڈے سبقت بنائے ہوئے نظر آ رہے تھے، لیکن آخری راؤنڈ کی گنتی ختم ہونے کے بعد جب ڈاٹا اپڈیٹ کیا گیا تو رویندر چوہان کی جیت پر مہر لگی دکھائی دی۔ رویندر چوہان نے بی جے پی امیدوار کو 1457 ووٹوں کے فرق سے شکست دی ہے۔ رویندر چوہان کو جہاں 5 لاکھ 86 ہزار 788 ووٹ حاصل ہوئے، وہیں سنتوک راؤ کو 5 لاکھ 85 ہزار 331 ووٹ ملے۔ اس سیٹ پر تیسرا مقام ونچت بہوجن اگھاڑی امیدوار اویناش وشوناتھ کو حاصل ہوا جنھوں نے 80 ہزار 179 ووٹ حاصل کیے۔

قابل ذکر ہے کہ رویندر چوہان کے والد وسنت راؤ چوہان نے 2024 لوک سبھا انتخاب میں ناندیڑ سیٹ سے کانگریس کے ٹکٹ پر کامیابی حاصل کی تھی۔ ان کے اچانک انتقال سے یہ سیٹ خالی ہو گئی تھی اور ضمنی انتخاب کی ضرورت پڑ گئی۔ ایسے حالات میں جب مہاراشٹر اسمبلی انتخاب میں مہایوتی نے حیرت انگیز کامیابی حاصل کی ہے، ناندیڑ سیٹ پر کانگریس کا قبضہ ایک بڑی حصولیابی ہے۔

دلچسپ بات یہ ہے کہ مہاراشٹر اسمبلی انتخاب میں مہایوتی کی شاندار کامیابی کے بعد دہلی واقع بی جے پی ہیڈکوارٹر میں جب نریندر مودی نے پارٹی کارکنان سے خطاب کیا تو ناندیڑ لوک سبھا سیٹ پر ہوئے ضمنی انتخاب کا بھی تذکرہ کیا تھا۔ انھوں نے غلطی سے دعویٰ کر دیا کہ ناندیڑ میں جیت کے ساتھ مہاراشٹر میں بی جے پی کے لوک سبھا سیٹوں کی تعداد 9 سے بڑھ کر 10 ہو گئی ہے۔ ان کے اس بیان کے کچھ دیر بعد ہی الیکشن کمیشن کی ویب سائٹ نے جب اس سیٹ کا فائنل ریزلٹ اپڈیٹ کیا تو اس میں کانگریس امیدوار کو کامیاب دکھایا گیا۔ قابل ذکر بات یہ بھی ہے کہ ناندیڑ لوک سبھا کی دونوں اسمبلی سیٹوں (ناندیڑ نارتھ اور ناندیڑ ساؤتھ) پر مہایوتی میں شامل شندے گروپ والی شیوسینا کے امیدوار نے جیت درج کی ہے۔