وادی کشمیر میں تازہ برف باری، معمولات زندگی درہم برہم

سرینگر: وادی کشمیر میں محکمہ موسمیات کی پیش گوئی کے عین مطابق جمعہ کے شب سے ہی برف باری کا ایک اور مرحلہ شروع ہوا۔
گذشتہ شام شروع ہوئی برف باری سے ہفتہ کی صبح تک پوری وادی نے سفید چادر اوڑھ لی تھی۔

برف باری سے جہاں معمولات زندگی متاثر ہوئے ہیں وہیں کشمیر یونیورسٹی نے ہفتہ کو لئے جانے والے انٹرنس امتحانات ملتوی کرنے پر مجبور ہوگئی ہے۔ یو این آئی کو موصولہ اطلاعات کے مطابق گذشتہ شب سے وقفہ وقفہ سے جاری برف باری کے نتیجے میں میدانی علاقوں میں دن کے گیارہ بجے تک قریب تین سے چار انچ برف جمع ہوئی تھی جبکہ بالائی علاقوں میں زائد از ڈیڑھ فٹ برف جمع ہوئی تھی۔

محکمہ موسمیات کے صوبائی ڈائریکٹر سونم لوٹس کا کہنا ہے کہ وادی میں مغربی ہواؤں کے زیر اثر برف باری کا سلسلہ وقفہ وقفہ سے 23 جنوری تک جاری رہ سکتا ہے تاہم بعد ازاں موسم میں بتدریج بہتری واقع ہونے کی توقع ہے۔ انہوں نے کہا کہ بھاری برف باری سے وادی میں زمینی وفضائی رابطہ منقطع ہوسکتا ہے۔

ادھرصوبائی کمشنر کشمیر بصیر خان نے ایڈوائزری جاری کرتے ہوئے کہا کہ وادی کے نو اضلاع میں برفانی تودے گر آنے کی توقع ہے۔
انہوں نے لوگوں سے اپیل کی ہے کہ وہ خطرات کے پیش نظر گھروں سے باہر نکلنے میں احتیاط کریں۔

متعلقہ محکمہ نے لوگوں سے کہا ہے کہ وہ وافر مقدار میں اشیائے خورد ونوش اپنے لئے دستیاب رکھیں۔ادھر محکمہ کی ایڈوائزری کے پیش نظر ضلع ترقیاتی کمشنروں نے کسی بھی آفاتی صورتحال سے نمٹنے کے لئے تیار ہیں۔برف ہٹانے کے لئے مشینوں اور افرادی قوت کو کام پر لگادیا گیا ہے۔

تمام ضلع انتظامیوں نے ہیلپ لائنز قائم کی ہیں تاکہ برف باری کی وجہ سے کسی بھی مشکل صورتحال کے پیش نظر بر وقت اقدام کئے جائیں۔ تاہم مطلع رات بھر ابر آلود رہنے کے باعث وادی میں سردی کی شدت میں قدرے کمی واقع ہوئی۔

دریں اثنا محکمہ موسمیات کے مطابق ریاست کی گرمائی راجدھانی سری نگر میں کم سے کم درجہ حرارت منفی 2.0 ڈگری سینٹی گریڈ ریکارڑ کیا گیا جبکہ وادی کے مشہور ترین سیاحتی مقامات پہلگام اور گلمرگ میں کم سےکم درجہ حرارت بالترتیب منفی 4.4 ڈگری سینٹی گریڈ اور منفی 7.0 ڈگری سینٹی گریڈ ریکارڈ کیا گیا۔

لیہہ میں کم سے کم دررجہ حرارت منفی 9.2 ڈگری سینٹی گریڈ جبکہ کرگل میں کم سے کم درجہ حرارت منفی 18.9 ڈگری سینٹی گریڈ ریکارڈ کیا گیا۔

ریاست کی سرمائی راجدھانی جموں میں کم سے کم درجہ حرارت 8.3 ڈگری سینٹی گریڈ ریکارڑ کیا گیا جبکہ کٹرہ میں 9.2 ڈگری سینٹی گریڈ، بٹوٹ میں 3.9 ڈگری سینٹی گریڈ، بانہال میں 2.3 ڈگری سینٹی گریڈ اور بھدرواہ میں 1.3 ڈگری سینٹی گریڈ ریکارڈ کیا گیا۔