نوئیڈا: قوانین کی خلاف ورزی کرنے والے بلڈر پر ’نیشنل گرین ٹریبونل‘ نے لگایا 15 کروڑ روپے کا جرمانہ

ماحولیات کو نظر انداز کرنے کو لے کر اس وقت نیشنل گرین ٹریبونل (این جی ٹی) کا رویہ سخت نظر آ رہا ہے۔ 15 دن قبل ہی دہلی سمیت پورے این سی آر میں گریپ سسٹم نافذ کر دیا گیا ہے۔ قوانین کی خلاف ورزی کرنے والوں کا جگہ جگہ چالان بھی کاٹا جا رہا ہے اور ان پر جرمانہ لگایا جا رہا ہے۔ ایسے ہی ایک معاملے میں این جی ٹی نے نوئیڈا کے ایک بلڈر کو عمارت میں زیادہ منزل تیار کرنے کے لیے 15 کروڑ روپے کا معاوضہ دینے کی ہدایت دی ہے۔ این جی ٹی نے یہ فیصلہ نوئیڈا کے سیکٹر-77 میں ’ایکسپریس جینتھ‘ کی تعمیر پر ایکسپریس بلڈر اور پروموٹرس پرائیویٹ لمیٹڈ کے خلاف سنایا ہے۔

این جی ٹی سربراہ جسٹس اے کے گویل، جسٹس سدھیر اگروال اور ماہر رکن اے سینتھل بیل اور افروز احمد والی بنچ نے یہ کہا کہ یہ پہلے سے طے تھا کہ ای سی کی بنیاد پر گراؤنڈ پلس 18 منزلوں کی تعمیر ہونی تھی، لیکن بلڈر نے قوانین کی خلاف ورزی کر کے 5 ٹاور میں گراؤنڈ پلس 19 منزل کی تعمیر کی۔

بنچ نے کہا کہ بلڈر آلودگی ادائیگی اصول پر معاوضہ کی ادائیگی کرنے کے لیے جوابدہ ہے۔ لہٰذا اسے 15 کروڑ روپے معاوضہ دینے کی ہدایت دی جاتی ہے۔ این جی ٹی نے یہ بھی ہدایت دی ہے کہ بلڈر کو ایک ماہ کے اندر یہ جرمانہ گوتم بدھ نگر کے ضلع مجسٹریٹ کے پاس جمع کرانا ہوگا۔ اگر ایسا نہیں کیا جاتا تو پھر ایک ماہ بعد جبراً وصولی کی جائے گی۔