مظفرنگر کا فوجی عمران آسام میں شہید، جنازے میں کوئی بی جے پی لیڈر نہیں پہنچا، گاؤں میں ناراضگی

یوپی کے مظفرنگر سے تعلق رکھنے والے فوجی عمران بالیان آسام میں شہید ہو گئے اور ان کا جسد خاکی بدھ کے روز دہلی سے مظفرنگر پہنچا۔ ہندوستان زندہ آباد کے نعروں کے درمیان جسد خاکی کو عمران کے آبائی گاؤں ہرسولی میں لے جایا گیا۔ قافلہ کے ساتھ سینکڑوں کی تعداد میں لوگ قومی پرچم لے کر چل رہے تھے۔ بعد ازاں، ہزاروں افراد نے عمران بالیان کی تدفین میں شرکت کی اور انہیں خراج عقیدت پیش کیا۔

گاؤں میں پولیس فورس کے ساتھ ایس ڈی ایم بوڈھانہ کمار بھوپندر، سی او بوڈھانہ گرجا شنکر پرساد اور ایس ڈی ایم صدر دیپک کمار موجود تھے۔ سماجوادی پارٹی کے ضلع صدر پرمود تیاگی، آر ایل ڈی رہنما و سابق ایم ایل سی چودھری مشتاق اور سماج وادی پارٹی کے رہنما مہیش بنسل عمران کو خراج تحسین پیش کرنے پہنچے تھے۔ لیکن اس موقع پر برسر اقتدار جماعت بی جے پی کے کسی رہنما کا شرکت نہ کرنا کئی سوالات کو جنم دیتا ہے۔ اگرچہ کنبہ کا کہنا ہے کہ وہ نہیں چاہتے کہ اس معاملے پر کوئی سیاست ہو، لیکن گاؤں میں یہ بات عام ہے کہ کوئی عوامی نمائندہ یا حکمران جماعت کا کوئی رہنما گاؤں تک کیوں نہیں پہنچا۔

علی الصبح عمران کے جسد خاکی کے ہرسولی پہنچنے کی اطلاع پر ایس ڈی ایم اور سی او فورس کے ساتھ گاؤں پہنچے لیکن یہاں کے لوگوں کو اس بات کا ملال ہے کہ برسراقتدار جماعت کا کوئی لیڈر فوجی کی آخری رسومات میں شامل نہیں ہوا۔

شاہ پور تھانہ علاقہ کے گاؤں ہرسولی کے رہائشی عمران بالیان ولد طاہر تقریباً 10 سال قبل بھارتی فوج میں شامل ہوئے تھے اور فی الحال آسام میں تعینات تھے۔ شہید عمران اپنے پیچھے بیوی اور دو بچے چھوڑ گئے ہیں۔ پیر کی شام (2 نومبر) فوجی عمران کی اہلیہ کو فوج کے بیس کیمپ سے فون آیا اور ان سے کہا گیا کہ عمران کا انتقال ہو گیا ہے، حالانکہ انتقال کی اصل وجہ نہیں بتائی گئی۔ عمران کے انتقال کی اطلاع موصول ہونے کے ساتھ ہی کنبہ میں افراتفری پھیل گئی۔ گاؤں کے لوگ بھی تعزیت کے لئے فوجی کے گھر پہنچے۔ گاؤں کے کچھ لوگوں کا کہنا ہے کہ جس جگہ عمران تعینات تھا وہاں کبھی فائرنگ نہیں ہوئی۔

خیال رہے کہ ہرسولی گاؤں چرتھاول اسمبلی حلقہ کا حصہ ہے اور یہاں سے بی جے پی کے رکن اسمبلی وجے کشیپ ریاستی حکومت میں وزیر مملکت برائے محصول اور سیلاب کنٹرول ہیں۔ یہ اسمبلی حلقہ مظفر نگر پارلیمانی نشست میں آتا ہے، یہاں سے بی جے پی کے سنجیو بالیان دوسری بار فتحیاب رہے اور مرکزی حکومت میں وزیر مملکت بنائے گئے۔