تمل ناڈو میں بہار کے لوگوں سے مار پیٹ پر نتیش کمار ناراض، ڈی جی پی اور چیف سکریٹری کو سونپی اہم ذمہ داری

تمل ناڈو میں بہار کے لوگوں پر ہو رہے حملے کی خبروں پر نوٹس لیتے ہوئے بہار کے وزیر اعلیٰ نتیش کمار ایکشن میں آ گئے ہیں۔ انھوں نے اس معاملے میں بہار کے چیف سکریٹری اور پولیس ڈائریکٹر جنرل کو فوراً تمل ناڈو کے افسران سے بات کرنے اور ریاست کے لوگوں کی سیکورٹی یقینی کرانے کی ہدایت دی ہے۔

وزیر اعلیٰ نتیش کمار نے اپنے آفیشیل ٹوئٹر اکاؤنٹ سے ٹوئٹ کر اس کی جانکاری دیتے ہوئے لکھا کہ مجھے اخبارات کے ذریعہ سے تمل ناڈو میں کام کر رہے بہار کے مزدوروں پر ہو رہے حملے کی جانکاری ملی ہے۔ انھوں نے مزید لکھا ہے کہ میں نے بہار کے چیف سکریٹری اور پولیس ڈائریکٹر جنرل کو تمل ناڈو حکومت کے افسران سے بات کر وہاں رہ رہے بہار کے مزدوروں کی سیکورٹی یقینی کرنے کی ہدایت دی ہے۔

واضح رہے کہ میڈیا میں آ رہی خبروں میں بتایا جا رہا ہے کہ تمل ناڈو میں بہار کے لوگوں کے ساتھ مار پیٹ کے واقعات ہو رہے ہیں۔ مقامی لوگوں کے خوف سے بہار کے لوگ کارخانوں میں کام کرنے نہیں جا رہے ہیں۔ اس میں بیشتر مزدور ہیں۔ وہ اب تمل ناڈو چھوڑ کر گاؤں واپس آنا چاہتے ہیں، لیکن ٹرینوں میں ٹکٹ نہیں ملنے سے کمرے میں قید ہو کر رہ گئے ہیں۔ وہاں رہ رہے لوگ ویڈیوز اور تصویریں بھیج کر واقعہ کی جانکاری دے رہے ہیں۔

رپورٹ کے مطابق تمل ناڈو کے تریپور میں رہ رہے لوگوں نے بتایا کہ شمالی ہند اور بہار کے مختلف اضلاع کے لوگ کافی تعداد میں یہاں کام کر رہے ہیں۔ بڑے پیمانے پر باہر کے لوگ یہاں آ کر کام کرتے ہیں جس کی وجہ سے مقامی لوگ ناراض ہیں۔ ان کا الزام ہے کہ باہری لوگوں کی وجہ سے انھیں اپنی ریاست میں کام نہیں مل رہا ہے۔ حالانکہ کچھ لوگوں نے بتایا کہ بہاریوں پر حملے کے پیچھے کچھ شرارتی عناصر کا ہاتھ ہے۔

اس درمیان بہار اسمبلی کے بجٹ اجلاس کے دوران مذکورہ بالا معاملے کو لے کر جمعرات کو بی جے پی اراکین نے خوب ہنگامہ کیا اور ایوان سے واک آؤٹ کیا۔ حزب مخالف لیڈر وجئے کمار سنہا نے کہا کہ تمل ناڈو کے اندر جس طرح بہاری لوگوں کے ساتھ بربریت والا رویہ اختیار کیا گیا ہے وہ افسوسناک ہے۔ لیکن اس کے باوجود بہار کے وزیر اعلیٰ اس پر خاموشی سادھے ہوئے ہیں۔ حالانکہ نتیش کمار اس معاملے میں افسران کو ہدایت جاری کر چکے ہیں۔