اعظم گڑھ: بی جے پی امیدوار نِرہوا کو عوامی مخالفت کا سامنا، لگے ’نرہوا واپس جاو‘ کے نعرے

سماجوادی پارٹی صدر اکھلیش یادو کے خلاف اعظم گڑھ سے بی جے پی امیدوار اور بھوجپوری فلم اداکار دنیش لال یادو عرف نرہوا نے پیر کے روز اعظم گڑھ میں اپنا پہلا روڈ شو کیا اور اس پہلے ہی روڈ شو میں انھیں کئی جگہ مخالفت کا سامنا کرنا پڑا۔ نرہوا کے روڈ شو کی مخالفت کر رہے لوگوں نے ’اکھلیش یادو زندہ باد‘ اور ’نرہوا تم واپس جاو‘ کے نعرے بھی لگائے۔

ہندی نیوز ویب سائٹ امر اجالا کی خبر کے مطابق نرہوا کا روڈ شو جب اعظم گڑھ کے پرمان پور گاوں سے ہو کر گزرا تو مقامی لوگوں نے ان کے قافلے کو روکنے کی کوشش کی۔ انھیں آگے نہیں بڑھنے دیا جا رہا تھا۔ مخالفت کر رہے لوگ انھیں واپس جانے کو کہہ رہے تھے۔ بعد ازاں پولس نے مقامی لوگوں کو بھگانا شروع کیا۔ اس زبردستی سے مقامی لوگ مشتعل ہو گئے اور ’اکھلیش یادو زندہ باد‘ اور ’نرہوا تم واپس جاو‘ کے نعرے لگانے لگے۔ ناراض لوگوں نے پولس اور نرہوا کے قافلے پر پتھراو بھی کیے۔ پولس کو نرہوا کے قافلے کو باہر نکالنے کے لیے کافی مشقت کرنی پڑی۔

روڈ شو کے دوران بی جے پی امیدوار دنیش لال میڈیا سے بھی مخاطب ہوئے۔ انھوں نے اکھلیش یادو پر نشانہ سادھتے ہوئے کہا کہ اکھلیش یادو بہت بڑے لیڈر ہیں، لیکن وہ غلط راہ پر چل رہے ہیں۔ ہم سچ کے ساتھ ہیں اور ہمیشہ جیت سچ کی ہی ہوتی ہے۔

قابل ذکر ہے کہ بی جے پی میں شامل ہوتے ہی انھیں حکومت کی طرف سے وائی پلس درجے کی سیکورٹی دستیاب کرائی گئی ہے۔ نرہوا نے اعظم گڑھ کے ضلع مجسٹریٹ اور ایس پی کو خط لکھ کر ایس پی کارکنان سے جان کو خطرہ بتاتے ہوئے وائی پلس سیکورٹی کا مطالبہ کیا تھا۔