جیل میں بند کشمیری لیڈر انجینئر عبدالرشید شیخ کو این آئی اے نے دی بطور رکن پارلیمنٹ حلف لینے کی اجازت

اٹھارہویں لوک سبھا کے لیے منتخب اراکین میں سے ایک انجینئر عبدالرشید شیخ اب تک لوک سبھا رکن کی شکل میں حلف نہیں لے سکے ہیں۔ دراصل وہ ٹیرر فنڈنگ کے ایک معاملے میں قید و بند کی صعوبت برداشت کر رہے ہیں، لیکن انسداد دہشت گردی ایجنسی این آئی اے نے اب انھیں بطور رکن پارلیمنٹ حلف لینے کی اجازت دے دی ہے۔ اس معاملے میں اب دہلی کی ایک عدالت کے فیصلے کا انتظار ہے جو کل سامنے آنے والا ہے۔ اس فیصلے میں ظاہر کیا جائے گا کہ کشمیری لیڈر انجینئر عبدالرشید شیخ کن شرائط پر حلف برداری کریں گے۔

قابل ذکر ہے کہ انجینئر راشد کے نام سے مشہور عبدالرشید شیخ نے حال ہی میں ہوئے لوک سبھا انتخاب میں بطور آزاد امیدوار بارہمولہ سیٹ سے کامیابی حاصل کی ہے۔ وہ 2019 سے تہاڑ جیل میں بند ہیں۔ این آئی اے نے ان پر ٹیرر فنڈنگ معاملے میں الزام عائد کیا تھا۔ وہ اٹھارہویں لوک سبھا میں باقی اراکین کے ساتھ حلف نہیں لے پائے۔ اپنی نظر بندی کے باوجود عبدالرشید نے جموں و کشمیر کے سابق وزیر اعلیٰ عمر عبداللہ کو 2 لاکھ سے زائد ووٹوں کے فرق سے شکست دی۔

گزشتہ ہفتہ (29 جون) کے روز ایڈیشنل سیشن جج کرن گپتا نے این آئی اے کو انجینئر رشید کی عبوری ضمانت کی عرضی پر جواب دینے کا حکم دیا تاکہ ان کی حلف برداری کا راہ ہموار ہو سکے۔ عدالت نے این آئی اے کو یکم جولائی تک اپنا جواب جمع کرنے کی ہدایت دی تھی۔

عبدالرشید کے علاوہ پنجاب کے کھڈور صاحب سیٹ سے جیت درج کرنے والے خالصتان حامی امرتپال سنگھ بھی جیل میں بند ہیں۔ وہ بھی دیگر اراکین پارلیمنٹ کے ساتھ حلف نہیں لے پائے۔ 2023 سے آسام کے ڈبروگڑھ جیل میں بند امرتپال این ایس اے قانون کے تحت جیل میں بند ہیں اور فی الحال باہر نہیں آ سکتے۔ امرتپال کے وکیل نے کچھ دنوں پہلے میڈیا کو بتایا تھا کہ ان کی ضمانت کے یے عرضی پنجاب حکومت کے محکمہ داخلہ اور ڈی سی دفتر میں بھیجی جا چکی ہے، جس پر فیصلہ آنا ابھی باقی ہے۔