اگلا قدم یہ دیکھنے کے بعد کہ وعدے پورے ہوتے ہیں یا نہیں : ساکشی ملک

دہلی پولیس نے جمعرات (15 جون) کو ہندوستانی ریسلنگ فیڈریشن کے سبکدوش ہونے والے صدر برج بھوشن شرن سنگھ کے خلاف چارج شیٹ داخل کی۔واضح رہے وزیر کھیل انوراگ ٹھاکر کی یقین دہانی کے بعد پہلوانوں نے اپنا احتجاج 15 جون تک ملتوی کر دیا تھا۔ انوراگ ٹھاکر نے انہیں یقین دلایا تھا کہ 15 جون تک برج بھوشن کے خلاف چارج شیٹ داخل کر دی جائے گی۔ اب اس معاملے پر اولمپک میڈلسٹ ساکشی ملک نے بڑا بیان دیا ہے۔

نیوز پورٹل ’اے بی پی ‘ پر شائع خبر کے مطابق ساکشی ملک نے کہا کہ ان کا  اگلا مرحلہ اس وقت سامنے آئے گا جب ہم سب کچھ دیکھیں گے کہ کیے گئے وعدے پورے ہو رہے ہیں یا نہیں۔ انہوں نے کہا کہ وہ  یعنی احتجاج کرنے والے پہلوان  انتظار کر رہے ہیں۔ ساکشی ملک  نے خبر رساں ایجنسی اے این آئی کو بتایا کہ چارج شیٹ میں واضح طور پر کہا گیا ہے کہ وہ  یعنی برج بھوشن شرن سنگھ قصوروار ہیں، لیکن ہمارے وکیل نے ایک درخواست دائر کی ہے تاکہ وہ چارج شیٹ کو جلد سے جلد دیکھ کر الزامات کا پتہ لگا سکیں۔

ساکشی ملک  کا مزید کہنا تھا کہ پہلے دیکھیں گے کہ کیے گئے وعدے پورے ہوتے ہیں یا نہیں، اس کے بعد اگلا قدم اٹھائیں گے۔ واضح رہے دہلی پولیس نے برج بھوشن کے خلاف چھ خواتین پہلوانوں کو جنسی طور پر ہراساں کرنے کے معاملے میں چارج شیٹ داخل کی ہے۔

پولیس نے نابالغ پہلوان کی جانب سے برج بھوشن کے خلاف درج کرائی گئی شکایت کو منسوخ کرنے کی سفارش کرتے ہوئے کہا کہ کوئی ٹھوس ثبوت نہیں ملا۔نابالغ پہلوان نے پہلے برج بھوشن پر جنسی طور پر ہراساں کرنے کا الزام لگایا تھا، لیکن بعد میں پیچھے ہٹ گئی۔ تقریباً 1500 صفحات کی چارج شیٹ میں تمام چھ خواتین پہلوانوں کے تفصیلی بیانات ثبوت کے ساتھ ہیں۔

نیوز پورٹل اے بی پی پر شائع خبر کے مطابق پولس نے بالغ پہلوانوں کی جانب سے برج بھوشن سنگھ کے خلاف لگائے گئے الزامات میں آئی پی سی کی دفعہ 354، 354 اے اور 354 ڈی، 506 پارٹ 1 کے تحت چارج شیٹ داخل کی ہے۔ اس کے ساتھ ہی ریسلنگ فیڈریشن کے سابق اسسٹنٹ سکریٹری ونود تومر کے خلاف بھی دفعہ 109، 354، 354A، 506 کے تحت چارج شیٹ داخل کی گئی ہے۔ اس کے ساتھ ہی پولیس نے پین ڈرائیو میں ڈیجیٹل ثبوت بھی عدالت میں داخل کیے ہیں۔