توہین رسالت معاملہ: رکن اسمبلی ٹی راجہ کی مشکلات میں اضافہ، نئے کیسز درج

تلنگانہ پولیس نے بدھ کے روز معطل بی جے پی رکن اسمبلی ٹی راجہ سنگھ کے خلاف پیغمبر محمد پر قابل اعتراض تبصرہ کرنے کے لیے تین مزید مجرمانہ معاملے درج کیے۔ جاری احتجاجی مظاہروں کے درمیان حیدر آباد کے نامپلی اور ملکپیٹ پولیس تھانوں میں یہ نئےمعاملے درج کیے گئے ہیں۔

رکن اسمبلی پر مذہب کی بنیاد پر لوگوں کے درمیان دشمنی کو فروغ دینے کا معاملہ درج کیا گیا ہے۔ تعزیرات ہند کی دفعات 153اے، 188، 295اے، 298، 505(1)(بی)(سی)، 505(2) اور 506 کے تحت معاملے درج کیے گئے ہیں۔ راجہ سنگھ کے خلاف تلنگانہ کے کچھ دیگر اضلاع میں بھی معاملوں کا اندراج ہوا ہے۔

قابل ذکر ہے کہ حیدر آباد کے مختلف حصوں اور تلنگانہ کے دیگر کئی مقامات پر مسلم شکایت درج کرانے کے لیے ریلیوں کی شکل میں پولیس تھانے پہنچ رہے ہیں۔ راجہ سنگھ کے خلاف منگل کو چھ تھانوں میں معاملہ درج کیا گیا تھا۔ زبردست مظاہرہ کے بعد انھیں 23 اگست کو گرفتار کر لیا گیا تھا۔ پھر 23 اگست کو ہی ایک عدالت نے انھیں ضمانت دے دی تھی اور فوری رِہائی کا حکم صادر کیا تھا۔ اس حکم کے بعد انھیں چھوڑ دیا گیا، جس پر لوگوں میں کافی ناراضگی ہے۔