بابا صدیقی قتل کیس میں نیا پہلو سامنے آیا، پولیس نے ’ایس آر اے پروجیکٹ‘ کی تحقیق شروع کی

ممبئی: بابا صدیقی کے قتل کے معاملے میں اب تک ان کے سلمان خان کے قریب ہونے کی بات سامنے آ رہی تھی اور قیاس تھا کہ لارنس بشنوئی نے ان پر اس دوستی کی بنیاد پر حملہ کیا۔ مگر اب اس کیس میں نیا پہلو بھی سامنے آیا ہے۔ ممبئی کرائم برانچ نے اس قتل کے پیچھے ایس آر اے (سلم ریہبلیٹیشن اتھارٹی) پروجیکٹ کے سلسلہ میں بھی تحقیقات کا آغاز کر دیا ہے۔

کرائم برانچ نے بابا صدیقی کے قتل کے چند دن بعد ایس آر اے اتھارٹی سے باندرہ میں جاری ایس آر اے منصوبوں کے حوالے سے معلومات طلب کی تھیں۔ پولیس ذرائع کے مطابق بابا صدیقی کے بیٹے ذیشان صدیقی نے اشارہ دیا تھا کہ ان کے والد کے قتل کے پیچھے ایس آر اے پروجیکٹ کا تنازعہ بھی شامل ہو سکتا ہے۔ ذیشان نے اپنے والد کے قتل کے چند دن بعد ایک سوشل میڈیا پوسٹ میں کہا کہ ان کے والد نے کمزور افراد کے حقوق اور ان کے گھروں کی حفاظت کی خاطر اپنی جان دی۔

اس بیان کے بعد کرائم برانچ نے ایس آر اے افسران کو خط بھیجا جس میں باندرہ علاقے میں جاری تمام ایس آر اے منصوبوں کی تفصیلات مانگی گئیں۔ ایس آر اے حکام نے جواب دیتے ہوئے اس مخصوص علاقے میں جاری تمام منصوبوں کی معلومات فراہم کی ہیں اور پولیس اب ان منصوبوں کی دستاویزات کا جائزہ لے رہی ہے۔

مزید برآں، بابا صدیقی اور ان کے بیٹے ذیشان صدیقی کچھ ماہ قبل باندرہ-کرلا کمپلیکس (بی کے سی) کے علاقوں میں دو سلم ریہبلیٹیشن پروجیکٹس، سنت گیانیشور نگر اور بھارت نگر کے خلاف احتجاج بھی کر رہے تھے۔ ان کے بقول، وہاں رہنے والوں کو یہ نہیں بتایا گیا تھا کہ ریہبلیٹیشن کے بعد انہیں کس سائز کا مکان دیا جائے گا۔