نیٹ امتحان پیپر لیک: سی بی آئی نے شکنجہ کیا سخت، اوئسِس اسکول کے پرنسپل سمیت 10 افراد حراست میں

نیٹ امتحان پیپر لیک معاملے میں سی بی آئی سرگرمی کے ساتھ اپنی پوچھ تاچھ جاری رکھے ہوئی ہے۔ سی بی آئی کی ٹیم اس وقت ہزاری باغ میں ہے اور طویل پوچھ تاچھ کے بعد اس نے 10 لوگوں کو حراست میں لے لیا ہے۔ ان 10 لوگوں میں اوئسِس پبلک اسکول کے پرنسپل احسان الحق بھی شامل ہیں۔

میڈیا رپورٹس کے مطابق اوئسِس پبلک اسکول کے پرنسپل کے علاوہ سی بی آئی نے 5 انوجلیٹر، 2 آبزرور، ایک سنٹر سپرنٹنڈنٹ اور ایک ای رکشہ ڈرائیور کو حراست میں لیا ہے۔ یہ سبھی لوگ اس اسکول سے تعلق رکھتے ہیں جہاں نیٹ امتحان منعقد کیا گیا تھا۔ سی بی آئی کی ٹیم ان سبھی کو حراست میں لے کر چرہی گیسٹ ہاؤس میں تفصیل سے پوچھ تاچھ کر رہی ہے۔ سی بی آئی یہ جاننے کی کوشش کر رہی ہے کہ سوال نامہ کب تقسیم کیا گیا، پیپر کس طرح تقسیم ہوا، پیپر کی پیکنگ اور ٹرنک میں چھیڑ چھاڑ کی کیا صورت حال رہی۔ ان سوالوں کا جواب حاصل کر پیپر لیک کے تار کو تلاش کیا جا رہا ہے۔

بتایا جا رہا ہے کہ سی بی آئی ٹیم کے ساتھ ایف ایس ایل کی ٹیم بھی ہزاری باغ کے اوئسِس پبلک اسکول میں موجود ہے۔ ایف ایس ایل کی ٹیم یہاں پیپر لیک کے تکنیکی پہلوؤں کی جانچ کر رہی ہے۔ ایف ایس ایل کی ٹیم کو سی بی آئی اپنے ساتھ اسکول لے کر پہنچی تھی۔ جانچ کو آگے بڑھانے کے لیے سی بی آئی نے ابھی تک یہاں سے 3 موبائل فون ضبط کیے ہیں۔ ان میں 2 فون پرنسپل احسان الحق کے ہیں اور ایک فون وائس پرنسپل امتیاز عالم کا ہے۔ امتیاز عالم نیٹ امتحان میں اسکول کے سنٹر سپرنٹنڈنٹ بھی تھے۔ سی بی آئی ٹیم نے جانچ کی کارروائی کو آگے بڑھاتے ہوئے اوئسِس اسکول کے پرنسپل کے گھر سے لیپ ٹاپ کے علاوہ وائس پرنسپل کے لیپ ٹاپ کو بھی اپنے قبضے میں لے لیا ہے۔