نیٹ تنازعہ: این ایس یو آئی نے وزیر تعلیم سے استعفیٰ کا کیا مطالبہ، پارلیمنٹ گھیراؤ کا اعلان

نیٹ کے امتحان میں سامنے آئی بے ضابطگیوں پر مرکزی وزیر تعلیم دھرمیندر پردھان کے استعفیٰ کا مطالبہ تیز ہو گیا ہے۔ بدھ کے روز کانگریس کی طلبا تنظیم ’نیشنل اسٹوڈنٹس یونین آف انڈیا‘ (این ایس یو آئی) نے نیٹ امتحان میں گھوٹالہ کا الزام عائد کرتے ہوئے کہا کہ اس کی ذمہ داری لیتے ہوئے مرکزی وزیر تعلیم دھرمیندر پردھان کو فوراً استعفیٰ دینا چاہیے۔ طلبا تنظیم نے کہا کہ اس معاملے میں این ایس یو آئی سے جڑے طلبا 180 سے زیادہ یونیورسٹیوں اور 250 ضلعوں میں احتجاجی مظاہرہ کریں گے اور 24 جون کو پارلیمنٹ کا گھیراؤ بھی کریں گے۔

اس کے ساتھ ہی طلبا تنظیم نے امتحان منعقد کرانے والے ادارہ نیشنل ٹیسٹنگ ایجنسی (این ٹی اے) پر بھی فوری پابندی لگانے کا مطالبہ کیا ہے۔ این ایس یو آئی کا کہنا ہے کہ نیٹ میں ہوا یہ ملک کو جھنجھوڑ دینے والا گھوٹالہ ہے۔ کانگریس پارٹی کے دفتر میں بدھ کو این ایس یو آئی کے قومی صدر ورون چودھری نے کہا کہ اس ایشو پر فوراً کارروائی کیے جانے کی ضرورت ہے۔

ورون چودھری نے میڈیا کے سامنے کہا کہ نیٹ کے امتحان میں کئی بے ضابطگیاں اور بدعنوانیوں کی مثالیں سامنے آئی ہیں۔ انھوں نے غیر جانبدار اور شفاف امتحان منعقد کرنے میں این ٹی اے کی سالمیت و بھروسہ پر بھی سوال اٹھایا۔ ورون چودھری نے نیٹ میں گھوٹالے کا الزام عائد کرتے ہوئے کہا کہ مجرموں کے خلاف نتیجہ خیز کارروائی کرنے میں ناکام رہنے پر وزیر تعلیم دھرمیندر پردھان کو استعفیٰ دینا چاہیے۔ اس معاملے کو مناسب طریقے سے مخاطب کرنے میں وزیر تعلیم کی نااہلیت، بدعنونای سے پاک تعلیمی ماحول یقینی کرنے کے ان کے فرائض میں ناکامی کا اشارہ دیتی ہے۔

ورون چودھری نے کہا کہ نیٹ گھوٹالہ سے متاثر طلبا کو انصاف ملے، یہ یقینی بنانا ہوگا۔ ساتھ ہی انھوں نے شفاف جانچ اور امتحان کے عمل میں چھیڑ چھاڑ کے قصوروار پائے جانے والوں کے خلاف سخت کارروائی کا مطالبہ کیا۔ انھوں نے کہا کہ 21 جون کو 180 سے زیادہ یونیورسٹیوں اور 250 ضلعوں میں احتجاجی مظاہرہ کیا جائے گا۔ اگر ان کے مطالبات پورے نہیں کیے گئے تو این ایس یو آئی اپنا مظاہرہ تیز کرنے کے لیے 24 جون کو پارلیمنٹ کا گھیراؤ کرے گی۔ طلبا بدعنوانی اور بے ضابطگی سے پاک غیر جانبدار اور منصفانہ تعلیمی نظام کی وکالت کرنا جاری رکھیں گے۔