روزگار پیدا کرنے پر توجہ دینے کی ضرورت: دیوے گوڑا

سابق وزیر اعظم اور جنتا دل (سیکولر) کے رکن ایچ ڈی دیوے گوڑا نےکل راجیہ سبھا میں کہا کہ ملک میں زراعت اور روزگار کے لیے کام کئے جانے کی ضرورت ہے۔عام بجٹ 2024-25 پر بحث میں حصہ لیتے ہوئے، دیوے گوڑا نے پیر کو کہا کہ یہ زراعت والا ملک ہے اور اس ایوان میں بیٹھے زیادہ تر اراکین اسی شعبے سے وابستہ ہیں۔ اس سال کے بجٹ میں وزیر خزانہ نرملا سیتا رمن نے اپنی بجٹ تقریر میں زراعت کے شعبے کے لیے کئی اہم اعلانات کیے ہیں اور 32 فصلوں کے لیے 109 اقسام کے بیج جاری کرنے کا ذکر کیا ہے، جو کہ قابل ستائش ہے۔

ملک کے کسانوں کا گزشتہ پانچ چھ دہائیوں سے استحصال ہونے کا الزام لگاتے ہوئے انہوں نے کہا کہ وہ ملک کے وزیر اعظم بھی رہے ہیں اور جب تک وہ اس عہدہ پر رہے کسانوں کے مفاد میں کام کیا ہے۔ انہوں نے کہا کہ رواں مالی سال کے بجٹ میں کسانوں کے لیے کئی اہم اعلانات کیے گئے ہیں۔

روزگار پیدا کرنے اور ہنرمندی کی ترقی کے لیے پانچ تجاویز دیتے ہوئے دیوے گوڑا نے کہا کہ بجٹ میں ملازمین سے متعلق مراعات دینے کی بات کی گئی ہے جو کہ قابل ستائش ہے۔ انہوں نے کہا کہ ڈس انویسٹمنٹ سے حاصل ہونے والی رقم کو اہم امور میں دوبارہ لگایا جانا چاہیے۔

بنگلورو میں پینے کے پانی کے بحران کا مسئلہ اٹھاتے ہوئے، دیوے گوڑا نے کہا کہ 1991 میں جب شہر کی آبادی آٹھ لاکھ تھی، اس وقت کاویری ندی سے پانی کا الاٹمنٹ کیا گیا تھا، لیکن آج شہر کی آبادی 1.35 کروڑ ہے اور اس کی ضروریات پوری کرنا ممکن نہیں ہو پارہا ہے۔وہ اس معاملے میں کسی پر تنقید نہیں کر رہے لیکن یہ مسئلہ سب کی توجہ کا متقاضی ہے۔