پرگیہ ٹھاکر کو امیدوار بنانے سے رام داس اٹھاولے ناراض

این ڈی اے کی مصیبتیں کم ہونے کا نام نہیں لے رہی ہیں اب این ڈی اے کی ایک اتحادی پارٹی ریپبلیکن پارٹی آف انڈیا کے سربراہ اور مرکزی وزیر رام داس اٹھاولے نے مالیگاؤں دھماکوں کی ملزم پرگیہ ٹھاکر کو امیدوار بنانے کے لئے بی جے پی کی سخت الفاظ میں تنقید کی ہے۔

اٹھاولے نے کہا ہے کہ ’’پرگیہ ٹھاکر کا نام مالیگاؤں دھماکوں میں آیا ہوا ہے اور سابق اے ٹی ایس سربراہ مرحوم ہیمنت کرکے کے پاس ان کے خلاف کافی ثبوت تھے‘‘۔ انہوں نے پرگیہ ٹھاکر کے اس بیان کی بھی سخت الفاط میں مذمت کی جس میں انہوں نے کہا تھا کہ مرحوم ہیمنت کرکرے کی موت ان کی بد دعا کی وجہ سے ہوئی تھی۔

واضح رہے بی جے پی نے پرگیہ ٹھاکر کو بھوپال کی سیٹ سے اپنا امیداور بنایا ہے اور امیدوار بننے کے بعد انہوں نے کئی متنازعہ بیانات دیئے ہیں جس میں ایک بیان شہید ہیمنت کرکرے کے خلاف ہے۔ ہیمنت کرکرے کے خلاف دیئے ان کے بیان کی سب نے مذمت کی ہے۔ چاروں طرف مذمت کے بعد پرگیہ ٹھاکر نے اپنا بیان واپس لے لیا تھا مگر اس بیان کے لئے معافی نہیں مانگی تھی۔

دوسری جانب بی جے پی کی سینئر رہنما اوما بھارتی نے کہا کہ پرگیہ ٹھاکر کو امیدوار بنانا کوئی غلط نہیں ہے اور نہ ہی قانون کی خلاف ورزی ہے۔ انہوں نے پرگیہ ٹھاکر کو ایک بہت بڑا سنت قرار دیتے ہوئے کہا کہ ’’وہ ایک مہان سنت ہیں ان سے میرا کیا موازنہ۔ میں تو ایک عام اور بے وقوف قسم کی انسان ہوں‘‘۔