نائب سنگھ سینی نے دوسری مرتبہ ہریانہ کے وزیر اعلیٰ کے طور پر لیا حلف

نائب سنگھ سینی نے دوسری دوسری مرتبہ ہریانہ کے وزیر اعلیٰ کی حیثیت سے حلف لے لیا۔ حلف برداری کی تقریب پنچکولہ کے دسہرہ میدان میں منعقد ہوئی، جہاں ریاست کے گورنر بنڈارو دَتاتریہ نے انہیں عہدے اور رازداری کی کا حلف دلایا۔ اس تقریب میں وزیر اعظم مودی، مرکزی وزراء، ریاستی وزراء اور دیگر اہم شخصیات نے شرکت کی۔

نائب سنگھ سینی کی کابینہ شامل وزرا میں انیل وج، کرشن لال پنوار، کرشن کمار بیدی، اروند شرما، گورو گوتم، شروتی چودھری، مہی پال ڈھانڈا، راؤ نربیر سنگھ، آرتی راؤ، رنبیرد سنگھ گنگوا، راجیش ناگر جگرکر، وپل گوئل اور شیام سنگھ رانا شامل ہیں۔

نائب سنگھ سینی کی حلف برداری کی تقریب میں مرکزی وزیر داخلہ امت شاہ، وزیر دفاع راج ناتھ سنگھ اور دیگر ریاستوں کے وزراء بھی موجود تھے۔ اس موقع پر سینی نے ہریانہ میں 25000 عہدوں کے لیے ہونے والے بھرتی امتحانات کے نتائج جاری کرنے کا وعدہ کیا۔ انہوں نے کہا، ’’ہمارے کمیشن نے نتائج تیار کر لیے ہیں اور ہم آج اپنے 24000 طلباء کے نتائج جاری کریں گے۔‘‘

نائب سنگھ سینی نے نوجوانوں کے لیے بغیر کسی رشوت کے روزگار دینے کے اپنے عزم کا بھی ذکر کیا۔ انہوں نے کہا، ’’ہماری حکومت کا ایجنڈا نوجوانوں کو ’بغیر پرچی، بغیر خرچی' روزگار دینا ہے، تاکہ غریب خاندانوں کے بچے بھی ترقی کر سکیں۔‘‘ خیال رہے کہ ہریانہ کے حالیہ انتخابات میں بی جے پی نے 90 میں سے 48 سیٹیں جیت کر واضح اکثریت حاصل کی تھی۔