نوین پٹنائک کے قریبی پانڈین فعال سیاست سے سبکدوش، اوڈیشہ میں بی جے ڈی کی شکست کی ذمہ داری قبول کی

نئی دہلی: اوڈیشہ میں لوک سبھا اور اسمبلی انتخابات میں بیجو جنتا دل (بی جے ڈی) کی کراری شکست کے کچھ ہی دن بعد سابق وزیر اعلی نوین پٹنائک کے معاون وی کے پانڈین نے سیاست سے ریٹائرمنٹ لے لی ہے۔ انہوں نے فعال سیاست سے سبکدوشی کا اعلان کر دیا ہے۔

وی کے پانڈین نے ایک ویڈیو جاری کر کے اپنے فیصلے کا اعلان کیا۔ وی کے پانڈین کو سابق سی ایم پٹنائک کا جانشین سمجھا جا رہا تھا۔ بی جے ڈی کی شکست کے بعد پانڈین کو عوام میں نہیں دیکھا گیا اور انہوں نے پارٹی لیڈروں کی میٹنگ میں بھی شرکت نہیں کی۔

وی کے پانڈین 5 جون کو نوین پٹنائک کے ساتھ استعفیٰ دینے راج بھون نہیں گئے اور نہ ہی ان کی رہائش گاہ پر منعقدہ پارٹی لیڈروں کی میٹنگ میں شرکت کی۔ انہوں نے ویڈیو جاری کرتے ہوئے کہا، ’’سیاست میں آنے کا میرا مقصد صرف نوین بابو (پٹنائک) کی حمایت کرنا تھا، اب میں نے فعال سیاست چھوڑنے کا فیصلہ کیا ہے۔‘‘

وی کے پانڈین نے کہا، ’’اگر اس سفر کے دوران مجھ سے کوئی غلطی ہوئی ہے تو میں اس کے لیے معافی چاہتا ہوں۔ میرے خلاف شروع کئے گئے بیانیہ مہم کی وجہ سے بی جے ڈی کو انتخابات میں نقصان اٹھانا پڑا، اس لیے میں اس کے لیے پورے بی جے ڈی خاندان سے معافی مانگتا ہوں۔ بی جے ڈی کے لاکھوں کارکنوں کو نیک خواہشات۔‘‘

خیال رہے کہ بی جے ڈی کو اوڈیشہ اسمبلی انتخابات میں بی جے پی کے ہاتھوں کراری شکست کا سامنا کرنا پڑا ہے۔ بی جے پی نے ریاستی اسمبلی میں 78 سیٹیں جیت کر بی جے ڈی کی 24 سالہ حکمرانی کا خاتمہ کر دیا ہے۔ دوسری طرف نوین پٹنائک کی قیادت والی پارٹی بی جے ڈی کو 51 سیٹیں ملی ہیں۔ کانگریس نے 14 سیٹیں جیتی ہیں، سی پی آئی (ایم) نے ایک سیٹ جیتی ہے۔ تین آزاد امیدوار بھی انتخابات میں کامیاب ہوئے ہیں۔

نوین پٹنائک اور ان کی پارٹی کے لیے حیران کن بات یہ تھی کہ پارٹی کو لوک سبھا انتخابات میں ایک بھی سیٹ نہیں ملی۔ دوسری طرف بی جے پی نے ریاست میں لوک سبھا کی 20 سیٹوں پر قبضہ کر لیا، جب کہ کانگریس نے ایک سیٹ جیتی۔

تاہم، انتخابات میں پارٹی کی کراری شکست کے بارے میں وی کے پانڈین کی تنقید پر ردعمل ظاہر کرتے ہوئے، نوین پٹنائک نے ہفتے کے روز کہا تھا کہ پارٹی کی شکست کے لیے پانڈین کی تنقید مایوس کن ہے اور انہوں نے شاندار کام کیا ہے۔ نوین پٹنائک نے یہ بھی اعادہ کیا کہ پانڈین ان کے جانشین نہیں ہیں اور اوڈیشہ کے لوگ فیصلہ کریں گے کہ ان کا جانشین کون ہوگا۔