کانگریس کی قیادت میں ’قومی اتحاد‘ کی حکومت بنے گی: کمل ناتھ

گوالیار: مدھیہ پردیش کے وزیر اعلی کمل ناتھ نے اعتماد ظاہر کرتے ہوئے کہا ہے کہ لوک سبھا انتخابات کے بعد ملک میں کانگریس کی قیادت میں ایک قومی اتحاد قائم ہو گا اور اس کی ہی حکومت بنے گی۔

کانگریس کے سینئرلیڈر اور سابق مرکزی وزیر کمل ناتھ نے گوالیار چمبل اورآنچل میں انتخابی مہم کے دوران جمعرات کو يواین آئی سے بات چیت میں کہا کہ موجودہ لوک سبھا انتخابات ’مودی ورسیز پورا ملک' ہو گیا ہے۔ سال 2014 کے لوک سبھا انتخابات کے مقابلے اس بار کانگریس کی سیٹوں میں کم از کم تین گنا اضافہ ہوگا۔ ہمارے اتحادیوں کی کارکردگی بھی بہتر رہے گی۔ وہیں بی جے پی کی سیٹ 282 سے گھٹ کر 150 کے ارد گرد رہنے کا امکان ہے۔

اسی سے متعلق ایک سوال کے جواب میں انہوں نے کہا کہ کانگریس کی قیادت والے متحدہ ترقی پسند اتحاد (یو پی اے) كو اکثریت ملنے کی پوری امید ہے، لیکن اگر ایسا نہیں ہوا تو بھی ہم بات چیت کے ذریعےاس کا حل نکالیں گے۔ سبھی غیر قومی جمہوری اتحاد ی پارٹیوں (نان این ڈی اے) کا مقصد ایک ہے اور وہ بی جے پی کو اقتدار سے دوررکھنا چاہتی ہیں۔ ان کا دعوی ہے کہ این ڈی اے میں بھی بہت سے لوگ نریندر مودی کو وزیر اعظم کے طور پر پسند نہیں کرتے۔ ہدف اگر ایک ہی ہو تو اتحاد آسان ہو جاتا ہے۔

تقریباً چار دہائیوں سے مرکزی سیاست میں سرگرم رہے کمل ناتھ نے دہراتے ہوئے کہا کہ سبھی جماعتوں کا مقصد بی جے پی کو اقتدار سے دور رکھنا ہے اور انتخابات کے بعد ہم سب آپس میں بات چیت کر کے قومی اتحاد قائم کرکے حکومت بنائیں گے۔

یہ پوچھے جانے پر کہ کیا مایاوتی، اکھلیش یادو اور ممتا بنرجی جیسے لیڈروں کے ساتھ سبھی متحد رہ پائیں گے، کمل ناتھ نے دہرایا کہ جب سب کا مقصد ایک ہو تو چیزیں آسان ہو جاتی ہیں۔

کمل ناتھ نے کہا کہ نریندر مودی نے سال 2014 کے لوک سبھا انتخابات کے دوران نوجوانوں کو سالانہ دو کروڑ روزگار دینے، شہریوں کے کھاتے میں 15 لاکھ پہنچانے اور کسانوں کو بھی کئی مراعات دلانے کا وعدہ کیا تھا۔ لیکن مودی اور بی جے پی پانچ برسوں میں اس سلسلے میں کچھ نہیں کر پائی۔

سینئر کانگریس لیڈر نے کہا کہ اس لئے اب مودی لوک سبھا انتخابی مہم کے دوران ان اہم مسائل سے لوگوں کی توجہ ہٹانے کی کوشش کر رہے ہیں۔ بے روزگاری، زرعی شعبے کے مسائل اور چھوٹے تاجروں کے مسائل، بڑے مسائل ہیں۔ لیکن ان سے متعلق وزیر اعظم کوئی بات نہیں کر رہے ہیں۔ لہذا اب انہوں نے اپنی باتوں کو رخ قوم پرستی اور ملک کی سلامتی پر کی جانب موڑ دیا ہے۔

وزیر اعلی کمل ناتھ نے کہا کہ ملک کے عوام بہت سمجھدار ہے۔ وہ سب کچھ قبول کر سکتے ہے، لیکن انہیں دھوکہ دیاجائے، وہ یہ برداشت نہیں کر سکتے۔ اس لوک سبھا انتخابات میں ملک کے عوام مودی کو سبق سكھاكر ہی رہیں گے۔

ان کا دعوی ہے کہ ملک کے عوام یہ بھی سمجھ چکے ہیں کہ ان کا مستقبل کانگریس کے ہاتھوں میں محفوظ ہے۔ یہی پارٹی غریبوں، کسانوں اور نوجوانوں سمیت سبھی طبقوں کے مفادات کی توجہ دے سکتی ہے۔