مہاراشٹرا میں جے پی نڈا نے انتخابات کے دوران بغاوت کے امکان کا اظہار کیا

مہاراشٹر کے نائب وزیر اعلیٰ اور سینئر لیڈر دیویندر فڑنویس کی رہائش گاہ پر بی جے پی کے سینئر رہنماؤں کی میٹنگ ہوئی۔ اس میٹنگ میں مہاراشٹر بی جے پی کی کور کمیٹی اور دیگر رہنماؤں نے شرکت کی۔ میٹنگ میں بی جے پی کے قومی صدر جے پی نڈا نے اسمبلی انتخابات کا جائزہ لیا۔

ذرائع کے مطابق مہاراشٹر اسمبلی انتخابات سے قبل اس اہم میٹنگ کے دوران مہایوتی کے رہنماؤں کے ساتھ مل کر الیکشن لڑنے کی اپیل کی گئی۔ پچھلے کچھ دنوں سے شندے اور اجیت پوار کا موقف بدلا ہوا نظر آ رہا ہے ۔ اجیت پوار اور ایکناتھ شندے کو 'لاڈلی بہن' اسکیم پر الگ الگ مہم چلاتے ہوئے دیکھا گیا۔ ان دونوں کے درمیان تنازعہ میں بی جے پی کو ثالثی کرنی پڑی۔

پچھلے کچھ دنوں پہلے کابینہ کی میٹنگ میں اس حوالے سے اجیت پوار اور شیوسینا لیڈر کے درمیان ناراضگی کی خبر آئی تھی۔ اسی لئے جے پی نڈا نے کہا کہ بی جے پی لیڈروں کو بڑے بھائی کا کردار ادا کرنا چاہئے اور دونوں پارٹیوں کا خیال رکھنا چاہئے۔ اس کے علاوہ جے پی نڈا نے انتخابات کے دوران بغاوت کے امکان کو ظاہر کرتے ہوئے بی جے پی لیڈروں کو چوکنا رہنے کو کہا۔

جے پی نڈا کے ساتھ مرکزی وزیر اور بی جے پی مہاراشٹر کے انچارج بھوپیندر یادو، مرکزی وزیر پیوش گوئل، پارٹی کی ریاستی یونٹ کے سربراہ چندر شیکھر باونکولے، ممبئی یونٹ کے صدر آشیش شیلر، سابق مرکزی وزیر راؤ صاحب دانوے اور قانون ساز کونسلر پروین دریکر فڑنویس کی رہائش گاہ پر موجود ہیں۔گزشتہ ہفتے مرکزی وزیر داخلہ امت شاہ نے ممبئی کا دورہ کیا اور شنڈے، فڑنویس اور نائب وزیر اعلیٰ اجیت پوار کے ساتھ میٹنگ کی۔مہاراشٹر میں اسمبلی انتخابات نومبر میں ہونے کا امکان ہے۔