ایم وی اے یوتھ الائنس کی میٹنگ میں بے روزگاری کے معاملے پر بی جے پی حکومت کو گھیرنے کا فیصلہ

مہا وکاس اگھاڑی (ایم وی اے) کی یوتھ ونگ نے بے روزگاری کے معاملے پر بی جے پی کی قیادت والی ریاستی حکومت کو گھیرنے کا فیصلہ کیا ہے اوراس مقصد کے تحت 6 مارچ کو یشونت راؤ چوہان سینٹرمیں ’یووا مہاراشٹر ابھیمان میلہ‘ کا انعقاد کیا ہے۔ اس پروگرام میں ایم وی اے یوتھ الائنس کے مستقبل کی سمت اور انتخابی لائحہ عمل طے کیا جائے گا۔

اس ضمن میں ایم وی اے یوتھ الائنس کی جانب سے جاری پریس ریلیز کے مطابق پی ایم مودی ہر سال ملک کے نوجوانوں کو 2 کروڑ نوکریاں فراہم کرنے کا وعدہ کرکے اقتدار میں آئے تھے لیکن اقتدار میں آنے کے بعد انہوں نے بغیر سوچے سمجھے کچھ ایسے فیصلے کیے جس نے ملک کی معیشت تباہ کر دی اور اس کے نتیجے میں ملک کے نوجوان بے روزگاری کے دلدل میں پھنس گئے۔

دریں اثنا کانگریس، شیوسینا-یو بی ٹی اور این سی پی- ایس سی پی کے نوجوان ونگ کی ایک میٹنگ بھی منعقد ہوئی جس میں لوک سبھا انتخابات کے لیے منصوبہ بندی اور اس میں نوجوانوں کو شامل کرنے کے طریقہ کار پر تبادلہ خیال کیا گیا۔ اس میٹنگ میں یہ فیصلہ کیا گیا ہے کہ نوجوانوں کی تنظیمیں نوجوانوں کے مسائل پر ہی توجہ مرکوز کریں اور ان مسائل پر بات کرنے کے لیے ریاستی سطح پر اجلاس منعقد کریں گی۔