جنتا کرفیو مسلم علاقوں میں صد فیصد کامیاب رہا، اذانیں دی گئیں، طبی عملہ کی ستائش

وزیر اعظم کی جانب سے کورونا وائرس کے خاتمہ کے لئے بلایا گیا ’جنتا کرفیو‘ پورے ملک میں کامیاب رہا۔ ممبئی کے گنجان مسلم آبادی والے علاقہ ناگپاڑہ، مدنپورہ، بھنڈی بازار، محمد علی روڈ، ماہم، باندرا اور دیگر مقامات پر بھی جنتا کرفیو صد فیصد منایا گیا اس دوران مسلم تنظیموں نے ضرورت مندوں میں کھانے کے پیکیٹ بھی تقسیم کیے اور مختلف چوراہوں پر اذانیں دی گئیں۔ ساتھ ہی ساتھ طبی عملہ کی ستائش کے لئے شام پانچ بجے تالیاں بھی بجائی گئیں۔

موصولہ اطلاعات کے مطابق آج شب معراج ہے لیکن مسلمانوں کی ایک بڑی آبادی کو روزہ کھولنے کے لئے فروٹ و روزہ کی دوسری اشیاء دستیاب نہیں ہوئیں جس سے مسلمانوں میں پریشانی دیکھی گئی۔ رضا اکیڈمی نے عوام سے اپیل کی تھی کہ جنتا کرفیو کے روز دوپہر 3؍بجے سے 4؍بجے کے درمیان اذانیں دی جائیں اور دعائیں کی جائیں۔

عوام نے پی ایم کی اپیل پر لبیک کہا اور پورے شہر کے گنجان مسلم علاقوں میں اذانیں دی گئیں جس میں بڑی تعداد میں نوجوان اور ضعیف لوگ شامل ہوئے۔

دیکھا یہ گیا کہ سورتی محلہ کے ناکے پر اذان دینے کے بعد یہ قافلہ سورتی محلہ کے بیچ و بیچ پہنچا پھر وہاں بھی اذان دی گئی جس میں بڑی تعداد میں لوگ شامل ہوئے۔

شام 5 بجے کے وقت طبی عملہ کی خدمات کو دیکھتے ہوئے ان کے لئے لوگوں نے تالیاں بجائیں، اسی کے ساتھ ساتھ لوگوں نے برتنوں کے ڈھکنوں پر بھی زور زور سے ہاتھ مار کر ڈاکٹروں کا شکریہ ادا کیا اور اللہ کے حضور میں دعا کی کہ اللہ تعالی ہمارے ملک کے ایک ایک شخص کو اس مہلک بیماری سے محفوظ رکھے۔