گجرات میں پولس کانسٹیبل کی پٹائی، 3 لوگ گرفتار

قانون کا خوف ختم ہوتا جا رہا ہے اور اب یہ خبریں عام ہوگئی ہیں کہ پولس والوں کی لوگو ں نے پٹائی کر دی ہے۔ ایسی ہی ایک خبر گجرات کے ودودرا سے آئی ہے، ودودرا دیہات کے ہیڈ کوارٹر میں تعینات پولس کانسٹیبل عارف اسماعیل شیخ جب ڈیوٹی ختم کر کے گھر واپس لوٹ رہے تھے تو ان کی کسی معمولی بات پر مقامی لڑکوں سے کہا سنی ہو گئی۔ جس کے بعد چار لڑکوں نے اسماعیل شیخ کی پٹائی کر دی۔

اس واقعہ میں عارف شیخ زخمی ہو گئے اور ان کے چہرے پر چوٹ کے نشان صاف دکھائی دے رہے ہیں۔ عارف شیخ نے اس واقعہ کی اپنے ڈیپارٹمنٹ میں شکایت درج کرا دی، جس کے بعد تین لوگوں کو گرفتار کر لیا گیا ہے۔ 44 سالہ عارف شیخ اجوا روڈ پر واقع ریاض اپارٹمنٹس میں رہتے ہیں۔

واضح رہے جس وقت عارف شیخ پر لڑکوں نے حملہ کیا اس وقت وہ پولس کی وردی میں نہیں تھے۔ انہوں نے بتایا کہ’’ اس حملہ میں ان کے منہ پر چوٹ آئی ہے جس کے بعد میں نے پولس اسٹیشن جاکر شکایت درج کرائی‘‘۔ اس واقعہ کی جانچ کا ذمہ پانی گیٹ پولس اسٹیشن کے سیکنڈ پولس انسپیکٹر راٹھوا کو دیا گیا ہے۔ پولس کانسٹیبل عارف شیخ نے ایف آئی آر میں مذہب کی وجہ سے ان کے ساتھ مار پیٹ کی وجہ قبول کی ہے۔ ایف آئی آر میں لکھا گیا ہے کہ چونکہ وہ مسلمان ہیں اس لئے ان کے ساتھ مار پیٹ کی گئی ہے۔

اس سے قبل اسی ماہ میں ہی گجرات کے گودھرا میں مبینہ طور پر جے شری رام نہ بولنے کے الزام میں تین مسلمان نوجوانوں کی پٹائی کا معاملہ سامنے آیا تھا۔ یہ تین نوجوان بائیک سے گھومنے کے لئے نکلے تھے تھے، ان لوگوں کو چھ لوگوں نے بیچ راستے میں روک کر جے شری رام بولنے کے لئے کہا اور جب ان نوجوانوں نے جے شری رام بولنے سے انکار کیا تو ان لوگوں نے ان کے ساتھ مار پیٹ شروع کر دی تھی۔ اس میں یہ تینوں نوجوان شدید زخمی ہو گئے تھے جس کے بعد ان کو گودھرا سیول اسپتال میں علاج کے لئے داخل کرایا گیا تھا۔ پولس نے اس بات سے انکار کیا تھا کہ ان نوجوانوں کو جے شری رام نہ بولنے کی وجہ سے پیٹا گیا تھا۔