رمضان میں انتخاب: علماء ناراض، الیکشن کمیشن سے تاریخ میں تبدیلی کا مطالبہ

رمضان کے مہینے میں لوک سبھا انتخابات کی تاریخوں کو لے کر ملک کا مسلم طبقہ پریشان ہے۔ کئی مسلم لیڈران اور لکھنؤ کے علماء حضرات نے الیکشن کمیشن کے اس قدم پر اعتراض ظاہر کیا ہے۔ ان لوگوں نے رمضان کے مہینے میں مسلم طبقہ کو ووٹ ڈالنے میں ہونے والی دقتوں کی وجہ سے الیکشن کمیشن سے مطالبہ کیا ہے کہ تاریخوں میں تبدیلی کی جائے۔

لکھنؤ عیدگاہ کے امام مولانا خالد رشید فرنگی محلی نے الیکشن کمیشن کے اس فیصلے سے ناراضگی ظاہر کرتے ہوئے کمیشن سے مسلمانوں کے جذبات کا خیال رکھنے اور رمضان کے مہینے میں انتخاب نہ کرانے کی درخواست کی ہے۔ مولانا خالد نے کہا کہ ’’رمضان کا مہینہ 5 مئی سے شروع ہو جائے گا۔ اگر چاند دکھائی دیا تو 6 مئی کو پہلا روزہ ہوگا۔ مئی میں گرمی کے سبب مسلمانوں کو ووٹ ڈالنے میں دقت ہو سکتی ہے۔ ان باتوں کا دھیان رکھتے ہوئے انتخابی کمیشن اگر تاریخوں میں کچھ رد و بدل کر دے تو بہتر ہوگا۔‘‘

شہر قاضی اور مفتی ابوالعرفان کا اس معاملے میں کہنا ہے کہ ’’5 مئی کو مسلمانوں کے سب سے پاکیزہ مہینہ رمضان کا چاند دیکھا جائے گا۔ چاند نظر آ جاتا ہے تو 6 مئی کو پہلا روزہ ہوگا۔ رمضان کے دوران زبردست گرمی کے سبب روزہ داروں کو ووٹ ڈالنے کے لیے گھروں سے نکلنے میں دقت ہوگی۔ اس سے ووٹ فیصد بھی گھٹے گا۔‘‘ انھوں نے مزید کہا کہ ’’ہم ہمیشہ لوگوں سے ووٹ زیادہ سے زیادہ ڈالنے کی اپیل بھی کرتے ہیں۔ لیکن اس دوران یہ مناسب نہیں ہو پائے گا۔ ہم انتخابی کمیشن سے اس بات کا خیال رکھتے ہوئے تاریخوں میں رد و بدل کا مطالبہ کرتے ہیں۔‘‘ ابوالعرفان نے یہ بھی کہا کہ 6، 12 اور 19 مئی کو ووٹنگ کا اعلان کیا گیا ہے جس دوران رمضان کا مہینہ جاری رہے گا۔ مسلمانوں کی سہولت کے لیے انتخابی کمیشن ان تاریخوں کی جگہ کوئی دوسری تاریخ منتخب کر لیں۔

شیعہ طبقہ کے مذہبی پیشوا مولانا کلب جواد کا کہنا ہے کہ انتخابی کمیشن کو تاریخوں کا اعلان کرتے وقت رمضان کی تاریخوں کا بھی دھیان رکھنا چاہیے تھا۔ ووٹ ڈالنے کے لیے لوگوں کو گھنٹوں لائن میں کھڑے رہنا پڑتا ہے۔ ایسے میں روزہ داروں کو گرمی کی شدت میں دقت ہو سکتی ہے۔ اس لیے ہم انتخابی کمیشن سے گزارش کرتے ہیں کہ انتخابات کی ان تاریخوں کو بدلا جائے۔

واضح رہے کہ انتخابی کمیشن نے 10 مارچ کو لوک سبھا انتخابات 2019 کی تاریخوں کا اعلان کر دیا۔ سات مراحل میں ہونے والے انتخابات کا پہلا مرحلہ 11 اپریل کو اور آخری مرحلہ 19 مئی کو ہوگا۔ 23 مئی کو ووٹوں کی گنتی ہوگی۔