سیل کے چیئرمین پر قاتلانہ حملہ، دو افراد گرفتار

نئی دہلی: جنوبی دہلی کے ہوڈکو پلیس واقع اگست کرانتی مارگ پر کار سوار کچھ لوگوں نے اسٹیل اتھارٹی آف انڈیا (سیل) کے چیئرمین انل کمار چودھری پر بدھ کی رات تقریباً 10:30 بجے قاتلانہ حملہ کر دیا۔ اس معاملے میں پولس نے دو افراد کو گرفتار کیا۔

جنوبی دہلی کےڈپٹی پولس کمشنر نےجمعرات کو بتایا کہ یہ حملہ اس دوران ہوا جب چودھری گزشتہ روز لودھی روڈ پر واقع سیل کے دفتر سے ایشیاڈ ولیج اپنی رہائش گاہ کی جانب لوٹ رہے تھے۔ کار سوار حملہ آوروں نے ان کی کار میں ٹکر مار دی۔ جب وہ اپنے ڈرائیور کے ساتھ باہرنکلے تو کار سوار چار افراد میں سے ایک نے ان کے ڈرائیور کا گلا دبا کر اسے قبضے میں لے لیا اور باقی تینوں نے ان کے اوپر لوہے کی راڈ سے حملہ کر دیا۔

اس دوران جائے وقوعہ سے گزرنے والی ڈفینس کالونی پولس اسٹیشن کی موٹر سائیکل پٹرولنگ دستے نے فوراً حملہ آوروں کو پکڑ لیا۔ سیل کے چیئرمین کو فوراً ٹراما سینٹر میں داخل کرایا گیا جہاں فرسٹ ایڈ کے بعد چھٹی دے دی گئی۔ پولس افسر نے بتایا کہ اس معاملے میں حوض خاص تھانے میں دفعہ 307 اور 34 کے تحت معاملہ درج کیا گیا ہے۔ پولس معاملے کی تفتیش کر رہی ہے۔

سیل کے چیئرمین نے اس واقعہ پرکہا، ’میں حملہ آوروں کے ذریعے کیے گئے اس غیر متوقع اور پرتشدد حملے سے حیران ہوں۔ مجھ پر قاتلانہ حملہ کیا گیا، اگر پولس موقع پر نہیں پہنچتی تو کچھ بھی ہوسکتا تھا۔ میں دہلی پولس کا بہت بہت شکر گزار ہوں۔ پولس اگر وقت پر نہ پہنچتی تو حملہ آوروں کو نہیں پکڑا جاسکتا تھا۔ مجھے مکمل اعتماد ہے کہ پولس اس معاملے کی تفتیش کرے گی اور تمام مجرموں کو گرفتار کرے گی۔