ممبئی، جہاں پہلے روزے سے ہی شروع ہو جاتی ہے عید کی تیاری

رمضان المبارک کا تصور یوں تو صوم و صلوٰۃ کی پابندی اور تسبیح و اذکار کی کثرت سے ہے لیکن اسی کے ساتھ عید اور اس کی تیاریوں سے بھی ہے جو اس ماہ مبارک کی رونقوں اور شادمانیوں کو دو بالا کر دیتا ہے۔ عروس البلاد ممبئی میں رمضان المبارک کے پہلے روزے سے ہی عید کی تیاری کی جھلک نظر آنے لگی ہے جس نے اس ماہ مبارک کی رونق کو مزید بڑھا دیا ہے۔

ممبئی میں کچھ علاقے ایسے ہیں کہ رمضان اورعید کا تصور ان کے بغیر نہیں کیا جا سکتا۔ مثال کے طور پر جنوبی ممبئی کا مشہور علاقے محمد علی روڈ، بھنڈی بازار و پائیدھونی، ناگپاڑہ و مدنپورہ وغیرہ۔ ان علاقوں میں اگر یہ کہاجائے تو غلط نہ ہوگا کہ رمضان کی آمد سے قبل ہی عید کی تیاری شروع ہوجاتی ہے۔ چونکہ پائیدھونی کے پاس ہی کپڑوں کا ایک بڑا بازار حجرہ محلہ بھی ہے جو خواتین و بچوں کے ملبوسات کے لیے مشہور ہے، اس لیے یہاں ممبئی کے دیگر علاقوں سے بھی بڑی تعداد میں لوگ خریداری کے لیے آتے ہیں۔

ان علاقوں میں صرف عید کی خریداری ہی نہیں بلکہ روزہ افطاری کا بھی خاص اہتمام ہوتا ہے۔ یہاں جتنی ہوٹلیں ہیں، وہ سب روزہ داروں کے لیے اپنے دسترخوان بچھا دیتے ہیں۔ اس کے علاوہ کھانے پینے شوقین لوگوں کے لیے یہاں خوب انتظام رہتا ہے۔ محمد علی روڈ پر واقع مینارہ مسجد اور سلیمان عثمان مٹھائی والے سے لے کر کھڑک تک ایسے کئی ہوٹل ہیں جہاں نت نئے پکوان لوگوں کاانتظار کرتے رہتے ہیں۔ اسی گلی میں کھانے پینے کی کئی ایسے اسٹالس بھی ہیں جن کے پکوانوں کو ’اسٹریٹ فوڈ‘ کے زمرے میں شمار  کیا جا سکتا ہے، مگر یہاں پر لوگوں کی بھیڑ قابل دید ہوتی ہے۔

یہی صورت حال ممبئی کے مضافاتی علاقے باندرہ، کھار، سانتاکروز وغیرہ کا بھی ہے۔ باندرہ اور سانتاکروز خواتین اور بچوں کے ریڈی ملبوسات ودیگر اشیا کے لیے مشہور ہیں۔ باندرہ میں ہل روڈ اور لنکنک روڈ اس کے لیے بہت مشہور ہیں۔ یہاں کی دوکانیں رمضان کی آمد سے قبل ہی مکمل طور پر سج دھج کر تیار ہیں جو نصف رمضان کے بعد پوری رات کھلی رہیں گی۔ رمضان المبارک کے پہلے روزے پر ہی ان علاقوں کا جائزہ لینے پر یہ کہے بغیر نہیں رہا جا سکتا کہ روز ے کے پہلے دن سے ہی یہاں عید کی تیاری شروع ہو گئی ہے۔