ممبئی: لاک ڈاؤن کا فیصلہ عوام کے ہاتھ میں ہے، نگراں وزیر اسلم شیخ

ممبئی: ممبئی شہر کے نگراں وزیر اسلم شیخ نے ایک پریس کانفرنس سے خطاب کرتے ہوئے کہا کہ ریاست مہاراشٹر بالخصوص ممبئی شہر میں کورونا کے بڑھتے معاملوں پر قابو پانے کے لئے حکومت ہر ممکن اقدامات کر رہی ہے، باوجود اس کے عوامی لا پرواہی و احتیاطی تدابیر کی خلاف ورزی کی خبریں موصول ہو رہی ہیں لہٰذا ان حالات میں یہی کہا جا سکتا ہے کہ لاک ڈاؤن کا فیصلہ عوام کے ہاتھ میں ہے، اگر عوام قواعد پر عمل نہیں کرتے ہیں تو لاک ڈاؤن ناگزیر ہو جائے گا۔

ممبئی شہر میں کورونا کے مریضوں کی بڑھتی تعداد پر تشویش کا اظہار کرتے ہوئے اسلم شیخ نے کہا کہ کورونا کی روک تھام کے لئے ریاستی حکومت ہر ممکن اقدامات کر رہی ہے، وزیر اعلیٰ وقتاً فوقتاً بی ایم سی اور محکمہ صحت کے ساتھ میٹنگ لے رہے ہیں اور حالات پر نظر بنائے ہوئے ہیں مگر باوجود اس کے کورونا کے معاملوں میں کمی نہیں آرہی ہے۔ جس کو دیکھتے ہوئے وزیر اعلیٰ نے خود لاک ڈاؤن کے لئے تیار رہنے کی بات کہی ہے اب یہ عوام پر منحصر ہے کہ وہ سرکاری قواعد کی پابندی کریں ورنہ ممبئی شہر میں بھی لاک ڈاؤن ناگریز ہے۔

کورونا کی روک تھام میں حکومت پر اپوزیشن کی تنقیدوں کے جواب میں نگراں وزیر اسلم شیخ نے کہا کہ ممبئی میونسپل کارپوریشن نے 80 فیصد نجی اسپتالوں کے بیڈ بھی اپنے پاس محفوظ رکھیں ہیں نیز نجی اسپتالوں کو ہدایت دی گئی ہے کہ وہ مکمل جانچ کے بغیر برائے راست مریضوں کو داخل نہ کریں ساتھ ہی بڑے پیمانے پر ٹیکہ کاری کا کام حکومت کی جانب سے کیا جا رہا ہے تو وہیں آج ملک بھر میں سب سے زیادہ کورونا کے مریضوں کی جانچ ( ٹیسٹنگ ) مہاراشٹر بالخصوص ممبئی شہر میں ہو رہی ہے اس لئے مریضوں کی تعداد بھی یہاں زیادہ ہے مگر جس طرح سے حکومت نے کورونا کے ابتدائی دور اور فی الوقت میں مریضوں کی تعداد میں قابو پانے کے لئے اقدامات کئے ہیں وہ ملک کی دیگر ریاستوں سے کئی زیادہ ہے اور جہاں تک اپوزیشن کی تنقیدوں کا سوال ہے تو یہاں یہ کہنا غلط نہیں ہوگا کہ بی جے پی کو عوام کی زندگی سے زیادہ اپنی سیاست پیاری ہے اس لئے چاہے وہ مذہبی مقامات کو کھولنے کو لیکر سیاست ہو، بسوں، لوکل ٹرینوں میں عام لوگوں کو سفر کی اجازت دینے کے بات ہو ہر جگہ بی جے پی نے صرف سیاست سے کام لیا ہے۔