ممبئی کی میئر کو جان سے مارنے کی دھمکی

ممبئی کی میئر کشوری پیڈنیکر کو کسی نامعلوم شخص نے جان سے مارنے کی دھمکی دی ہے اس سلسلے میں میئر کے دفتر سے متصل آزاد میدان پولیس اسٹیشن نے ، پیڈنیکر کو مبینہ طور پر موت کی دھمکیاں ملنے کے بعد نامعلوم شخص کے خلاف کیس درج کر لیا ہے ۔پولیس نے تعزیرات ہند کی (آئی پی سی) کی متعلقہ دفعات کے تحت کیس درج کیا ہے۔

پولیس کے مطابق ، 21 دسمبر کو پیڈنیکر کو نامعلوم موبائل نمبر سے فون آیا تھا اور فون کرنے والے نے اپنا تعارف نہیں کرایا لیکن وہ ہندی میں گفتگو کر رہا تھا ۔فون کرنے والے شخص نے مبینہ طور پر مئیر سے غیر مہذب زبان اندازمیں بات چیت کی اور انہیں جان سے مارنے کی دھمکی بھی دی۔

شام 6 بجے کے قریب اس وقت فون آیا جب پیڈنیکر کارپوریشن میں اپنے دفتر میں تھی ۔کچھ دنوں بعد ، معاملے کی اطلاع آزاد میدان پولیس اسٹیشن کو دی گئی ، جس نے فون کرنے والے کے خلاف 31 دسمبر کو کیس درج کیا۔

نام ظاہر نہ کرنے کی شرط پر ایک پولیس افسر نے بتلایا کہ پولیس نے تعزہرات ہند کی دفعہ 504 (2) ، 507 اور 509 کے تحت ایک کیس درج کیا ہے نیز فون کرنے والے کا سراغ لگا لیا گیا ہے اور اسکی گرفتاری کے لئے پولیس کی ایک ٹیم کو پڑوس کی ریاست میں روانہ کیا گیا ہے۔