سمندر میں پوری طرح غرق ہو جائے گی ممبئی! نئی تحقیق میں دعوی

سمندروں کی آبی سطح میں اضافہ دھیرے دھیرے خطرناک صورت حال اختیار کرتا جا رہا ہے۔ ایک نئی تحقیق میں اس بات کا انکشاف ہوا ہے کہ کچھ سالوں میں ممبئی پوری طرح غرق ہو جائے گی۔ رپورٹ کے مطابق قبل میں کیے گئے قیاسوں میں 2050 تک جتنے لوگوں کے متاثر ہونے کا اندازہ لگایا گیا تھا، اس سے تین گنا زیادہ لوگوں پر سمندر کی بڑھتی آبی سطح کا خطرہ منڈلا رہا ہے۔ یہ رپورٹ عالمی سطح پر سمندر کے کنارے والے علاقوں میں بسے لوگوں کو بہت کچھ سوچنے پر مجبو رکرتا ہے۔ ممبئی کے باشندوں کے لیے خطرہ بہت زیادہ ہے کیونکہ ممبئی کا نام و نشان مٹ جانے کا اندیشہ ہے۔

یہ تحقیق نیو جرسی واقع ایک سائنسی ادارہ ’کلائمیٹ سنٹرل‘ کے ذریعہ کی گئی ہے۔ رپورٹ ’نیچر کمیونکیشن‘ نامی رسالہ میں شائع ہوئی ہے جس میں دنیا کے کئی علاقوں کے بارے میں اندیشے ظاہر کیے گئے ہیں۔ شائع اس رپورٹ کے مطابق خطہ ارض کا قابل رہائش علاقہ جو کہ اس وقت 30 کروڑ لوگوں کا گھر ہے، سال 2050 تک ان کے گھروں میں کم از کم ایک بار سیلاب اپنا قہر برپا کرے گا۔ ناسا کے ذریعہ پہلے یہ اندازہ لگایا گیا تھا کہ ماحولیاتی تبدیلی کی وجہ سے آٹھ کروڑ لوگوں پر سمندر کی بڑھتی آبی سطح کا خطرہ ہے۔

یہاں قابل ذکر ہے کہ محققین نے اس بار خطہ ارض سے متعلق مستقبل کی جانکاری حاصل کرنے کے لیے سیٹلائٹ ڈاٹا کا استعمال نہیں کیا۔ اس بار سائنسدانوں نے آرٹیفیشیل انٹلیجنس تکنیک کے استعمال سے زیادہ بہتر نتیجہ برآمد کرنے میں کامیابی حاصل کی ہے۔ گزشتہ ماڈل میں سیٹلائٹ ڈاٹا کا استعمال کیا گیا جس میں بلڈنگ اور درختوں کی وجہ سے خطہ ارض کو اونچائی پر دکھا دیا گیا تھا۔

محققین کا کہنا ہے کہ پہلے کی تحقیق اور اس بار کے نتائج میں کافی فرق سامنے آیا ہے۔ ریسرچ کے چیف رائٹر اور کلائمیٹ سنٹرل کے سینئر سائنسداں ساکاٹ کلپ کا کہنا ہے کہ یہ قیاس شہروں، معیشتوں، سمندری ساحلوں اور ہماری زندگی کے اندر پورے عالمی دائروں کو بدلنے کے لیے فضائی تبدیلی کی صلاحیت کو دکھاتے ہیں۔ ماہرین کے مطابق یہی صورت حال رہی تو اس صدی کے وسط تک ویتنام اور ہندوستان کے کئی حصے زیر آب چلے جائیں گے۔ خطرے میں شامل علاقوں میں ممبئی جیسے زیادہ آبادی والے شہروں کے بڑے حصے شامل ہوں گے، جو 1.8 کروڑ سے زیادہ لوگوں کا گھر ہے اور آئندہ 30 سالوں میں تقریباً پوری طرح سے پانی میں غرق ہو جائیں گے۔