’مختار انصاری کو کھانے میں زہر دیا گیا!‘ افضال انصاری نے پھر کیا اپنے الزام کا اعادہ

سماج وادی پارٹی کے سابق رکن اسمبلی مختار انصاری کی موت کے بعد ان کے بھائی افضال انصاری نے ایک بار پھر اپنے بھائی کو زہر دیئے جانے کے الزام کا اعادہ کیا ہے۔ انہوں نے کہا ہے کہ میرے بھائی مختار کو جیل میں زہر دے کر قتل کیا گیا۔ میرے بھائی کو گزشتہ 19 مارچ کو زہر دیا گیا تھا۔

افضال انصاری نے کہا ہے کہ میرے بھائی کو قتل کرنے کا مقصد ’اسری چٹی کیس‘ میں برجیش سنگھ کو بچانا ہے۔ پوری حکومت برجیش سنگھ کو بچانے میں لگی ہے۔ افضال انصاری نے حکومت کی منشا پر سوال اٹھاتے ہوئے کہا ہے کہ حکومت زمین کو آسمان اور آسمان کو زمین کہہ رہی ہے۔ حکومت یہ سب برجیش کو بچانے کے لیے کر رہی ہے۔ برجیش داؤد ابراہیم کا ساتھی ہے۔

افضال انصاری نے مزید کہا ہے کہ جب ہم نے ڈاکٹروں سے مختار کے علاج کے بارے میں پوچھا تو ہمیں بتایا گیا کہ اب تک ایکسرے اور الٹراساؤنڈ کرایا جا چکا ہے۔ سوچی سمجھی سازش کے تحت میرے بھائی کو مارا گیا ہے۔ اگر مختار کی موت دل کا دورہ پڑنے سے ہوئی تو اس کے پیچھے کی وجہ بھی زہر دینا ہی ہے۔ اہل  خانہ کے مطابق مختار انصاری نے جیل میں قید کے دوران خود ہی جیل انتظامیہ پر کھانے میں میٹھا زہر ملا کر دیئے جانے کا الزام لگایا تھا۔

واضح رہے کہ باندہ جیل میں بند مختار انصاری کو طبیعت بگڑنے پر جیل انتظامیہ علاج کے لیے اسپتال لے گئی جہاں ڈاکٹروں نے انہیں مردہ قرار دے دیا۔ ابتدائی طبی تشخیص کے بعد ڈاکٹروں نے بیان جاری کیا کہ مختار انصاری کی موت دل کا دورہ پڑنے سے ہوئی ہے۔ مگر مختار انصاری کے اہل خانہ نے ان دعوں کو یکسر مسترد کردیا۔ گھر والے مسلسل کہہ رہے ہیں کہ مختار انصاری کو جان بوجھ کر قتل کیا گیا ہے، اسے زہر دیا گیا۔