ہنر ہاٹ سے 5 لاکھ لوگوں کو روزگار ملا، مختار عباس نقوی کا دعویٰ

لکھنؤ: گزشتہ 6 برسوں میں ”ہنرہاٹ“ کے ذریعہ 5 لاکھ سے زیادہ دستکاروں، شلپ کاروں، کاریگروں اور ان سے وابستہ لوگوں کوروزگار اور روزگار کے مواقع دستیاب ہوئے، ان خیالات کا اظہار مرکزی وزیر برائے اقلیتی امور مختارعباس نقوی نے آج ”ہنر ہاٹ“ لکھنو کے اختتام کے موقع پراودھ شلپ گرام میں نامہ نگاروں سے بات کرتے ہوئے کیا۔

انہوں نے مزید کہا کہ ایک طرف ”ہنرہاٹ“میں جہاں ملک کے ہرعلاقے کے ہاتھوں سے تیار نایاب مصنوعات دستیاب تھیں، وہیں دوسری جانب یہاں آنے والے لوگوں نے ملک کے مختلف علاقوں کے روایتی لذیذ کھانوں کا بھی لطف اٹھایا۔

مختار نقوی نے کہا کہ لکھنو کے”ہنرہاٹ“میں آندھراپردیش، آسام، بہار، چندی گڑھ، چھتیس گڑھ، دہلی، گوا، گجرات، ہریانہ، ہماچل پردیش، جموں وکشمیر، جھارکھنڈ، کرناٹک، کیرالہ، لداخ، مدھیہ پردیش، منی پور، میگھالیہ، ناگالینڈ، اڑیسہ، پانڈیچری، پنجاب، راجستھان، سکم، تمل ناڈو، تلنگانہ، اترپردیش، اتراکھنڈ، مغربی بنگال سمیت 31ریاستوں /مرکزکے زیرانتظام علاقوں سے تقریباً 500 ہنرکے استاد شامل ہوئے۔

یہ دستکار، کاریگر اپنے ساتھ ساتھ ازرخ، ایپلک، آرٹ میٹل ویئر، باگھ پرنٹ، باٹک، بنارسی ساڑی، بندھیج، بسترکی جڑی بوٹیاں، بلیک پوٹری، بلاک پرنٹ، بینت بانس کی اشیاء، چکن کاری، کاپربیل، ڈرائی فلاورس، کھادی کی مصنوعات، کوٹاسلک، لاکھ کی چوڑیاں، لیدر پشمینہ شال، رام پوری وائلین، لکڑی آئرن کے کھلونے، کانتھا امبرائڈری، براس پیتل کے سامان، کرسٹل گلاس،چندن کی فنکاری، لکڑی بینت کے فرنیچر نمائش اور فروخت کے لئے لے کر آئے۔

نقوی نے کہا کہ لکھنو”ہنرہاٹ“اِی پلیٹ فارم http://hunarhaat.org پر بھی ملک وبیرون ممالک کے لئے دستیاب رہا جہاں لوگوں نے سیدھے دستکاروں، کاریگروں کے دیسی سامانوں کی پذیرائی اور خریداری کی۔ اس کے علاوہ اب ”ہنرہاٹ“ جیم پورٹل (گورنمنٹ ای ما رکیٹ پلیس) پربھی دستیاب ہے۔

نقوی نے کہا کہ”ہنرہاٹ“میں ہر روز شام کے وقت ملک کے مشہور و معروف فنکاروں کے ذریعہ ’خود کفیل بھارت‘ تھیم پر پیش کیے گئے میوزک اورموسیقی کے پروگرام بھی ناظرین کی کشش کا مرکز رہے۔مشہورفنکاروں جیسے کیلاش کھیر(30جنوری)، ونود راٹھور(28جنوری)، سدیش بھوسلے (4 فروری) موہت کھنہ(22 جنوری)، جناب بھوپی(23جنوری)، ریکھاراج(24جنوری)، رانی اندرانی (25جنوری)، ہمسرحیات گروپ (26جنوری)، امن دیپ سنگھ (27جنوری)، پریم بھاٹیا(29جنوری)،شیبانی کشیپ (31جنوری)،شرما سسٹرس(یکم فروری)، عالمگیرخان (2فروری) مکیش پانچولی (3فروری) احسان قریشی (4فروری) اور دیگر فنکاروں نے اپنے پروگرام سے لوگوں کو محظوظ کیا۔

نقوی نے کہا کہ 25ویں ”ہنرہاٹ“ کا انعقاد مہاراجہ کالج گراؤنڈ، چام راجیہ پورم، میسور(کرناٹک) میں 06 سے 14فروری2021 تک کیا جا رہا ہے۔ آنے والے دنوں میں ”ہنرہاٹ“ کا انعقاد نئی دہلی (20فروری سے1مارچ2021)، کوٹا (28فروری سے7مارچ2021)، جے پور، چندی گڑھ، اندور، ممبئی، حیدرآباد، رانچی، سورت/احمدآباد، کوچی، پانڈیچیری وغیرہ مقامات پر منعقد ہوگا۔

خیال رہے کہ اترپردیش کی راجدھانی لکھنؤ کے اودھ شلپ گرام میں مرکزی وزارت برائے اقلیتی امور کے زیراہتمام 22 جنوری سے07 فروری2021 تک منعقد کیے گئے 24ویں ”ہنرہاٹ“میں جہاں ایک جانب تقریباً 29لاکھ سے زائد افراد نے آکر ہنر کے پشتینی دستکاروں، کاریگروں کی حوصلہ افزائی کی، وہیں کروڑوں روپئے کی دیسی مصنوعات کی خریداری کرکے وزیراعظم نریندرمودی کے”ووکل فارلوکل“ ”اَ بھیان کا اَبھیمان“ بنے۔

اودھ شلپ گرام، لکھنومیں منعقدہ 24ویں ”ہنرہاٹ“ کا افتتاح ریاست کے وز یر اعلیٰ یوگی آدتیہ ناتھ نے23 جنوری کو کیا تھا۔ ”ہنرہاٹ کے افتتاح کے موقع پر اترپردیش حکومت کے کئی سینئر وزراء اورمرکزی وریاستی حکومت کے سینئر افسران بھی موجود تھے۔