مکیش امبانی اپنے بیٹے اننت کی شادی کا دعوت نامہ لے کر سونیا گاندھی کے گھر پہنچے، 12 جولائی کو ہے تقریب

جمعرات کو مشہور و معروف تاجر مکیش امبانی سونیا گاندھی کی سرکاری رہائش 10 جن پَتھ پہنچے جہاں انھوں نے اپنے بیٹے اننت امبانی کی شادی کا دعوت نامہ پیش کیا۔ مکیش سونیا گاندھی کی رہائش سے واپس بھی ہو چکے ہیں جس کی ویڈیو سوشل میڈیا پر مختلف ہینڈل سے شیئر کی گئی ہے۔ خبر رساں ایجنسی اے این آئی نے بھی مکیش امبانی کی کار سونیا گاندھی کی رہائش سے نکلتے ہوئے ویڈیو شیئر کی ہے اور ذرائع کے حوالے سے اننت کی شادی کا دعوت نامہ سونیا کو پیش کیے جانے کا تذکرہ کیا ہے۔

دراصل اننت امبانی اور رادھیکا مرچنٹ 12 جولائی کو رشتۂ ازواج میں منسلک ہونے والے ہیں۔ اس سے قبل شادی کی تمام رسمیں مکمل ہو چکی ہیں۔ اننت رادھیکا کی شادی سے پہلے ممبئی میں ان کی رہائش انٹیلیا پر مامیرو تقریب بھی منعقد ہوا۔ مامیرو کے بارے میں کہا جاتا ہے کہ یہ شادی سے متعلق ایک گجراتی رسم ہے جس میں دلہن کے ماما اسے مٹھائی اور تحفہ دینے آتے ہیں۔ امبانی اور رادھیکا مرچنٹ کی شادی کو لے کر مکیش اور نیتا امبانی بذات خود لوگوں کو کارڈ تقسیم کر رہے ہیں اور شادی میں شامل ہونے کی دعوت دے رہے ہیں۔ ممبئی میں انھوں نے کئی سیاسی لیڈروں اور اداکاروں کے گھر جا کر خود انھیں شادی میں شرکت کی دعوت دی ہے۔

گزشتہ ماہ نیتا امبانی نے بابا وشوناتھ کو اپنے بیٹے اننت کی شادی کا دعوت نامہ دیا تھا۔ اس دوران انھوں نے 1.51 کروڑ روپے کا عطیہ کیا تھا۔ ماں انّاپورنا مندر میں ایک کروڑ روپے کی رقم بطور تحفہ پیش کیے جانے کی خبریں بھی سامنے آئی تھیں۔ بنارس کے بُنکروں کو ساڑی بنانے کے لیے آرڈر بھی نیتا امبانی نے دیا تھا اور کہا تھا کہ وہ 10 سال بعد بنارس آئی ہیں۔

قابل ذکر ہے کہ اننت اور رادھیکا کی شادی سے متعلق 12 جولائی سے 14 جولائی تک منعقد ہوگی۔ دونوں کی شادی کا دعوت نامہ انتہائی خوبصورت ہے جو گزشتہ دنوں سوشل میڈیا پر وائرل بھی ہوا تھا۔ اس کا ڈیزائن بالکل مندر کی طرح ہے جو چاندی کا بنا ہوا ہے۔ بہرحال، شادی کا فنکشن ممبئی کے جیو ورلڈ کنونشن سنٹر میں ہونا ہے۔ 12 جولائی کو شادی ہے، 13 جولائی کو ’آشیرواد‘ کی تقریب ہے اور 14 جولائی کو ولیمہ کا انعقاد ہوگا۔