مہاراشٹر میں ایم ایس آر ٹی سی ملازمین کی ہڑتال، 63 بس ڈپو مکمل طور پر بند، مسافر پریشان

ممبئی: مہاراشٹر اسٹیٹ روڈ ٹرانسپورٹ کارپوریشن (ایم ایس آر ٹی سی) کے ملازمین کی تنخواہوں میں اضافے اور دیگر مطالبات کو لے کر دو دنوں سے جاری ہڑتال کے باعث ٹرانسپورٹ خدمات متاثر ہوئیں۔ خاص طور پر گنیش اتسو سے پہلے اس ہڑتال کی وجہ سے لاکھوں مسافروں کو پریشانی کا سامنا کرنا پڑ رہا ہے۔

ملازمین ریاستی سرکاری ملازمین کے مساوی تنخواہ اور اپنے ریاستی سیکٹر کے ہم منصبوں کے برابر تنخواہ کے پیمانے پر ایڈجسٹمنٹ کا مطالبہ کر رہے ہیں۔ ایم ایس آر ٹی سی کے ترجمان نے بتایا کہ 11 ٹریڈ یونینوں کی ورکنگ کمیٹی کی طرف سے بلائی گئی ہڑتال کی وجہ سے کارپوریشن کے کل 251 بس ڈپو میں سے 63 بس ڈپو مکمل طور پر بند رہے اور 73 بس ڈپو جزوی طور پر بند رہے جبکہ باقی 115 مکمل طور پر آپریشنل رہے۔

وزیر اعلیٰ ایکناتھ شندے نے اس مسئلے کو حل کرنے کے لیے بدھ کی شام سہیادری گیسٹ ہاؤس میں ایم ایس آر ٹی سی ٹریڈ یونین لیڈروں کے ساتھ میٹنگ طلب کی۔ ہڑتال کی وجہ سے ریاست بھر میں مسافروں کو پریشانی کا سامنا ہے۔ معمول کی خدمات کے علاوہ ایم ایس آر ٹی کا گنیش اتسو کے لیے خصوصی بسوں کا آپریشن بھی متاثر ہوا ہے۔ یہاں 7 ستمبر سے 10 روزہ گنیش اتسو شروع ہو رہا ہے۔

ایم ایس آر ٹی سی کے عہدیداروں نے بتایا کہ کل پانچ ہزار اضافی 'فیسٹیول اسپیشل بسیں' بشمول مختلف گروپس کے ذریعہ بک کی گئی 4300 خدمات، 3 سے 7 ستمبر کے درمیان ممبئی، تھانے اور پالگھر سیکشنز سے چلانے کا منصوبہ بنایا گیا ہے۔ ایسی ایک ہزار سے زیادہ بسیں بدھ کو کونکن کے لیے روانہ ہونے والی تھیں۔

ایم ایس آر ٹی سی انتظامیہ نے کہا کہ ایک صنعتی عدالت نے ہڑتال کو غیر قانونی قرار دیا تھا اور ٹریڈ یونینوں اور ملازمین کو کام پر واپس آنے کی ہدایت کی تھی۔ کارپوریشن نے مقامی حکام کو ہدایت کی ہے کہ وہ ایسے افراد کے خلاف ایف آئی آر درج کریں جو ڈیوٹی کے لیے رپورٹ کرنے کے خواہشمند ملازمین کے کام میں رکاوٹ ڈالیں اور ایسے واقعات کی ویڈیو ریکارڈنگ کریں۔

ہڑتال کے اثرات کو دیکھتے ہوئے، ایم ایس آر ٹی سی بلا تعطل سروس کو یقینی بنانے کے لیے طویل مدتی معاہدوں پر ڈرائیوروں اور دیگر عملے کی تقرری پر غور کر رہی ہے۔