76 پروازوں کے ذریعہ 15,920 ہندوستانیوں کی واپسی : وزارت خارجہ

وزارت خارجہ نےاتوار یعنی کل بتایا کہ آپریشن گنگا کے تحت یوکرین اوراس کے ہمسایہ ممالک سے اب تک 76 پروازوں کے ذریعے 15,920 ہندوستانیوں کو ہندوستان واپس لایا جا چکا ہے۔وزارت نےکہا کہ جنگ زدہ یوکرین یا ہمسایہ ممالک میں پھنسے طلباء کو واپس لانے کے لیے آج شام تک مزید سات پروازوں کا انتظام کیا جائے گا۔

وزارت نے یہ بھی کہا کہ جنوری 2022 سے اب تک 21,000 سے زیادہ ہندوستانی جنگ زدہ یوکرین سے باہرآ چکے ہیں۔ پہلی ایڈوائزری جنوری میں ہندوستانی سفارت خانے نے جاری کی تھی۔ ان ہندوستانیوں میں سے 19,920 پہلے ہی ہندوستان پہنچ چکے ہیں۔وزارت کے مطابق اگلے 24 گھنٹوں میں ہندوستانی فضائیہ کی سی -17 سمیت سات پروازیں روانہ ہوں گی ۔

یوکرین پر روس کے حملے کے بعد کئی ہندوستانی شہری وہاں پھنسے ہوئے ہیں، جنہیں باری باری باہر نکالا جا رہا ہے۔ اسی دوران یوکرین کے پسوچن شہر سے نکالے گئے ہندوستانی اس وقت پولینڈ کی سرحد پر جا رہے ہیں، جب کہ 150 ہندوستانیوں کا ایک گروپ رومانیہ کی سرحد پر پہنچ گیا ہے۔

ہندوستانی سفارت خانے نے ٹوئٹ کرکے کہا ہے کہ ہندوستانی شہریوں کو وطن واپس لایا جارہا ہے۔ 44 ہندوستانیوں کے ایک گروپ نے پسوچن سے اپنا سفر شروع کیا ہے، جو لویو سے پولینڈ کی سرحد تک پہنچنے کے اپنے راستے پر ہیں۔ اس کے ساتھ ہی 150 ہندوستانیوں کا ایک اور گروپ رومانیہ کی سرحد پر پہنچ گیا ہے۔ ہماری کوششیں جاری ہیں۔ محفوظ اور مضبوط بنے رہیں۔

اس کے علاوہ ہنگری میں ہندوستانی سفارت خانے نے ایک ویڈیو ٹویٹ کیا جس میں طلبا اپنے گھر واپسی کے لیے پرجوش دکھائی دے رہے ہیں۔ وہ 'وندے ماترم اور 'بھارت ماتا کی جئے کے نعرے لگاتے نظر آ رہے ہیں۔

آج صبح ہنگری میں ہندوستانی سفارت خانے نے کہا تھا کہ وہ آپریشن گنگا کے تحت انخلاء کا آخری مرحلہ شروع کر رہے ہیں۔ تمام طلباء سے کہا گیا ہے کہ وہ ہنگری کے شہر راکوزی، بڈاپیسٹ میں پہنچ جائیں۔ ہفتے کے روز کیف میں ہندوستانی سفارت خانے نے کہا کہ انہوں نے پسوچن کے محفوظ علاقے سے تمام ہندوستانیوں کو نکال لیا ہے۔

وزارت خارجہ کے ترجمان ارندم باگچی نے کل نئی دہلی میں اپنی میڈیا بریفنگ میں کہا کہ پسوچن سے ہندوستانیوں کے انخلا کے لیے مزید پانچ بسوں کا انتظام کیا گیا ہے اور اس کے علاوہ وہاں ہندوستانیوں کے لیے کھانے اور پانی کے انتظامات کیے گئے ہیں۔ہندوستانی سفیر پارتھا ستپاتھی نے کل ایک پیغام میں کہا کہ کھارکیو اور سومی کو چھوڑ کر تقریباً تمام ہندوستانیوں کو یوکرین کے باقی حصوں سے نکال لیا گیا ہے ۔